(ម៉ានីល)៖ ប្រធានាធិបតី លោក Ferdinand Marcos Jr. បានអំពាវនាវឱ្យប្រជាជនហ្វីលីពីនបង្ហាញសាមគ្គីភាពជាមួយប្រជាជនម៉ូស្លីម ខណៈដែលប្រទេសអាស៊ីអាគ្នេយ៍ដែលកាន់សាសនាកាតូលិកភាគច្រើនមួយនេះ បានប្រារព្ធពិធីបុណ្យរ៉យ៉ាហាជ្ជី ឬ Eid al-Adha នៅថ្ងៃពុធនេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន​​ AFP នៅថ្ងៃពុធ ទី២៨ ខែមិថុនា ឆ្នាំ២០២៣។

ខណៈពេលដែលពួកគេប្រារព្ធពិធីបុណ្យ Eid al-Adha ដែលជាពិធីបុណ្យដ៏សំខាន់ទីពីរ ក្នុងសាសនាអ៊ីស្លាម ប្រធានាធិបតីហ្វីលីពីនបានទទួលស្គាល់ពីការរួមចំណែករបស់ជនជាតិភាគតិចម៉ូស្លីម ចំពោះវប្បធម៌ចម្រុះរបស់ប្រទេស។

លោក Marcos បាននិយាយនៅក្នុងសាររបស់លោកទៅកាន់ប្រជាជាតិហ្វីលីពីន​ យ៉ាងដូច្នេះថា «ប្រជាជាតិ​របស់​យើង​គឺជា​ទឹកដី​នៃ​ជំនឿ​ដ៏​សម្បូរ​បែប ហើយ​ប្រជាជន​ម៉ូស្លីម​ហ្វីលីពីន​បាន​ចិញ្ចឹម​បន្ថែម​នូវ​ជំនឿ​ទាំងនេះ និង​បាន​ជួយ​ជំរុញបន្ថែម​នូវ​ភាពចម្រុះ​ដ៏សម្បូរបែប​របស់យើង។ សូម​ឱ្យ​ការ​លះបង់​របស់​ពួក​គេ​ចំពោះ​ជំនឿ​ទាំង​នេះ​ភ្លឺ​ចែង​ចាំង​ពេញ​មួយ​ពិធីបុណ្យនេះ និងពង្រឹងបន្ថែមទៀតនូវចំណងមិត្តភាពរវាងគ្រួសារ មិត្តភ័ក្តិ និងសហគមន៍របស់យើង»។

លោកបានបន្តថា «សូមឱ្យយើងទាំងអស់គ្នារំលឹកពីសារៈសំខាន់នៃការលះបង់ និងភាពមិនអាត្មានិយម ដែលឆ្លុះបញ្ចាំងពីខ្លឹមសារនៃឱកាសនេះ ដើម្បីយើងអាចរួមដៃជាមួយបងប្អូនម៉ូស្លីមរបស់យើងមកពីជុំវិញពិភពលោក ក្នុងស្មារតីសន្តិភាព ឯកភាព និងការគោរពគ្នាទៅវិញទៅមក»។

គួរជម្រាបថា ប្រជាជនម៉ូស្លីមហ្វីលីពីនមានប្រមាណ ៥ភាគរយនៃចំនួនប្រជាជនហ្វីលីពីនសរុប ១១០លាននាក់។ ក្រុមជនជាតិភាគតិចទាំង១៣ ដែលត្រូវបានហៅជារួមថា ម៉ូរ៉ូ បង្កើតបានជាក្រុមដែលមិនមែនជាគ្រិស្តសាសនាដ៏ធំបំផុតនៅក្នុងប្រទេស។ ពួកគេភាគច្រើនរស់នៅលើកោះមីនដាណាវ និងប្រជុំកោះស៊ូលូ នៅភាគខាងត្បូងប្រទេសហ្វីលីពីន ក៏ដូចជានៅខេត្ត Palawan និងនៅក្នុងរដ្ឋធានីម៉ានីល៕