(ឡាអេ)៖ បណ្ដាប្រទេសជាសមាជិកបក្សសម្ព័ន្ធយោធា NATO ក្នុងតំបន់អឺរ៉ុបខាងកើត នៅថ្ងៃអង្គារសប្ដាហ៍នេះបានព្រមានថាវត្តមានរបស់ទាហានស៊ីឈ្នួល រុស្ស៉ី Wagner នៅលើទឹកដីបេឡារុស នឹងបង្កជាអស្ថិរភាពក្នុងតំបន់ ប៉ុន្តែអគ្គលេខាធិការ NATO លោក Jens Stoltenberg បាននិយាយថាបក្សសម្ព័ន្ធ យោធាលោកខាងលិចមួយនេះ បានត្រៀមលក្ខណៈរួចជាស្រេចដើម្បីការពារខ្លួនប្រឆាំងនឹងការគំរាមកំហែងទាំងឡាយ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃពុធ ទី២៨ ខែមិថុនា ឆ្នាំ២០២៣។
ថៅកែទាហានស៊ីឈ្នួល Wagner លោក យេវហ្គេនី ព្រីហ្គោហ្ស៉ីន បានធ្វើដំណើរទៅដល់ប្រទេសបេឡារុសហើយកាលពីថ្ងៃអង្គារសប្ដាហ៍នេះ ក្រោយមាន កិច្ចចរចាបញ្ចប់ការបះបោរប្រឆាំងនឹងវិមានក្រឹមឡាំង កាលពីថ្ងៃសៅរ៍សប្ដាហ៍មុន ក្រោមការសម្របសម្រួលពីលោកប្រធានាធិបតីបេឡារុស អាឡិចសាន់ឌឺ លូកាសិនកូ។ មិនតែប៉ុណ្ណោះ លោកប្រធានាធិបតី ពូទីន ក៏បានផ្ដល់ជម្រើសឱ្យទាហាន Wagner អាចទៅរស់នៅក្នុងប្រទេសបេឡារុសដែលជាសម្ព័ន្ធមិត្ត របស់រុស្ស៉ីផងដែរ។
ប៉ុន្តែ បណ្ដាប្រទេសជាសមាជិកបក្សសម្ព័ន្ធយោធា NATO ក្នុងតំបន់អឺរ៉ុបខាងកើតបានបង្ហាញក្ដីព្រួយបារម្ភចំពោះវត្តមានទាហានស៊ីឈ្នួលរុស្ស៉ី នៅបេឡារុស។ ថ្លែងនៅបន្ទាប់ពីជំនួបជាមួយលោក Stoltenberg និងមេដឹកនាំមកពីប្រទេស NATO ចំនួន៦ផ្សេងទៀត ក្នុងទីក្រុងឡាអេ កាលពីថ្ងៃអង្គារ ទី២៧ ខែមិថុនា ប្រធានាធិបតីលីទុយអានី លោក ហ្ស៉ីតាណាស់ ណូសេដា (Gitanas Nauseda) បានគូសបញ្ជាក់ដូច្នេះថា «ប្រសិនបើ Wagner ដាក់ពង្រាយទាហានជា ឧក្រិដ្ឋជនរបស់ពួកគេក្នុងប្រទេសបេឡារុស នោះបណ្ដាប្រទេសក្បែរខាង (បេឡារុស) ទាំងអស់នឹងត្រូវប្រឈមមុខនឹងអស្ថរិភាពដ៏គ្រោះថ្នាក់បំផុត»។ ក្រៅពី លោក ណូសេដា ប្រធានាធិបតីប៉ូឡូញ លោក ឌូដា ក៏បានបង្ហាញពីក្ដីកង្វល់ផងដែរ ដោយលោកសង្កត់ធ្ងន់ថាវត្តមានទាហាន Wagner លើទឹកដីបេឡារុស គឺជាកង្វល់មួយដ៏ធំ ដែលតម្រូវឱ្យ NATO ត្រូវតែធ្វើការសម្រេចចិត្តយ៉ាងរឹងមាំបំផុត។
តែយ៉ាងណាក៏ដោយ អគ្គលេខាធិការ NATO លោក Jens Stoltenberg បាននិយាយថាវាដូចជាលឿនពេក ក្នុងវាយតម្លៃពីហានិភ័យបង្កឡើងដោយវត្តមាន ទាហាន Wagner លើទឹកដីបេឡារុស ចំពោះសម្ព័ន្ធមិត្ត NATO ខណៈបក្សសម្ព័ន្ធយោធាមួយនេះបានបង្កើន និងពង្រឹងយោធារបស់ខ្លួនក្នុង តំបន់អឺរ៉ុបខាងកើត នារយៈពេលប៉ុន្មានឆ្នាំចុងក្រោយនេះ។
គួរបញ្ជាក់ថា បើតាមប្រធានាធិបតីប៉ូឡូញ លោក ឌូដា លោកផ្ទាល់សង្ឃឹមថាការគំរាមកំហែងបង្កឡើងដោយទាហានស៊ីឈ្នួលរុស្ស៉ី Wagner អាចនឹងក្លាយជា ប្រធានបទមួយសម្រាប់កិច្ចពិភាក្សា ក្នុងកិច្ចប្រជុំកំពូល NATO នៅប្រទេសលីទុយអានីចាប់ពីថ្ងៃទី១១ ដល់ថ្ងៃទី១២ ខែកក្កដាខាងមុខ៕
