(វ៉ាស៊ីនតោន)៖ ឆ្មាំឆ្នេរសមុទ្រអាមេរិក បានឱ្យដឹងនៅថ្ងៃព្រហស្បតិ៍សប្ដាហ៍នេះថានាវាមុជទឹកឯកជនមួយដែលបានបាត់ខ្លួនប៉ុន្មានថ្ងៃមកនេះ បានផ្ទុះនៅក្បែរ បំណែកនៃខ្មោចកប៉ាល់ Titanic ដោយបានផ្ដាច់ជីវិតមនុស្សនៅលើនាវាមុជទឹកនេះទាំង ៥នាក់។

ថ្លែងប្រាប់អ្នកសារព័ត៌មាន លោក​ឧត្តម​នាវី​ត្រី​ John Mauger នៃឆ្មាំឆ្នេរសមុទ្រអាមេរិក បានបញ្ជាក់ថាយានរ៉ូបូតមុជទឹកដែលត្រូវបានដាក់ពង្រាយដោយនាវាមួយ គ្រឿងរបស់កាណាដា បានរកឃើញបំណែកកប៉ាល់នាវាមុជទឹក Titan កាលពីព្រឹកថ្ងៃព្រហស្បតិ៍ (ម៉ោងក្នុងតំបន់) នៅក្បែរបំណែកខ្មោចកប៉ាល់ Titanic ក្នុងមហាសមុទ្រអាត្លង់ទិក ដែលនេះជាការបិទបញ្ចប់ការតាមស្វែងរកនាវាមុជទឹកអស់រយៈពេលជាង ៥ថ្ងៃមកនេះ។ ប៉ុន្តែ លោក John Mauger មិនបានបញ្ជាក់ថា សាកសពមនុស្សទាំង៥នាក់ មានសភាពបែបណានោះទេ ហើយក៏បានលម្អិតពីមូលហេតុដែលធ្វើឱ្យនាវាមុជទឹកនេះផ្ទុះនោះដែរ។

ដូច្នេះថាតើមនុស្សទាំង៥នាក់ដែលជិះនៅលើនាវាមុជទឹកខាងលើជានរណាខ្លះ?

* លោក Hamish Harding

លោក ហាមីស ហាឌីង (Hamish Harding) ជាមហាសេដ្ឋីអង់គ្លេសម្នាក់មានអាយុ៥៨ឆ្នាំ និងត្រូវបានចាត់ទុកថាជាអ្នកស្រាវជ្រាវរុករកដ៏អស្ចារ្យម្នាក់ ដែល បានធ្វើដំណើរស្រាវជ្រាវនៅជុំវិញពិភពលោកចាប់តាំងពីឆ្នាំ២០១៩មក។ លោកក៏ធ្លាប់បានធ្វើដំណើរទៅកាន់ទីអវកាសផងដែរកាលពីឆ្នាំ២០២២ ដោយជិះលើ យាន New Shepard របស់ក្រុមហ៊ុន Blue Origin ក៏ដូចជាធ្លាប់ធ្វើដំណើររុករកយ៉ាងជ្រៅក្រោមបាតមហាសមុទ្រប៉ាស៊ីហ្វិកក្នុងឆ្នាំ២០២១។

លោក Harding ដែលជាប្រធានក្រុមហ៊ុន Action Aviation ផងនោះ បានប្រាប់ឱ្យដឹងពីដំណើរចុះទៅមើលខ្មោចកប៉ាល់ Titanic នៅក្នុងសារមួយបង្ហោះលើ Facebook។ «ដោយសារតែស្ថានភាពអាកាសធាតុត្រជាក់ពេក ក្នុងតំបន់ Newfoundland អស់រយៈ៤០ឆ្នាំមកនេះ បេសកកម្មនេះនឹងក្លាយជាបេសកកម្ម ជាលើកដំបូងបំផុត និងជាបេសកកម្មមនុស្សតែមួយគត់ទៅទស្សនាកប៉ាល់ Titanic ក្នុងឆ្នាំ២០២៣។ អាកាសធាតុបានអំណោយផល ដូច្នេះយើងនឹងធ្វើ បេសកកម្មនៅថ្ងៃស្អែក»។ នេះជាសារបង្ហោះរបស់លោក Harding កាលពីថ្ងៃអាទិត្យសប្ដាហ៍មុន។

* លោក Shahzada និងកូនប្រុស Suleman Dawood

លោក សាស់ហ្សាដា ដាវូត (Shahzada Dawood) មានអាយុ៤៨ឆ្នាំ គឺជាអនុប្រធានក្រុមហ៊ុន Engro Corporation Limited ដែលមានមូលដ្ឋានក្នុងទីក្រុង Karachi ប្រទេសប៉ាគីស្ថាន។ ចំណែក កូនប្រុសរបស់លោកមានឈ្មោះ ស៊ីឡៃម៉ាន (Suleman) មានអាយុ១៩ឆ្នាំ។ នេះបើតាមសេចក្ដីថ្លែងការណ៍ពីក្រុមគ្រួសារ របស់លោក។ សេចក្ដីថ្លែងការណ៍នេះដដែលចេញផ្សាយកាលពីថ្ងៃអង្គារ ទី២០ ខែមិថុនា បានគូសបញ្ជាក់ដូច្នេះថា «កូនប្រុសរបស់យើង Shahzada Dawood និងកូនប្រុសរបស់គាត់ ស៊ូឡៃម៉ាន បានធ្វើដំណើរទៅទស្សនាខ្មោចកប៉ាល់ Titanic ក្នុងមហាសមុទ្រអាត្លង់ទិក។ គិតមកទល់នឹងពេលនេះ ការទំនាក់ទំនងត្រូវបាន កាត់ផ្ដាច់ជាមួយនាវាមុជទឹក ហើយមានព័ត៌មានតិចតួចប៉ុណ្ណោះ»។ លោក Shahzada និងកូនប្រុស ក៏មានសញ្ជាតិអង់គ្លេស ផងដែរ។

* Paul-Henri Nargeolet

លោក ប៉ូល ហង់រី ណាហ្សេអូឡេ (Paul-Henri Nargeolet) គឺជាអ្នកមុជទឹក និងជាអ្នកជំនាញស្រាវជ្រាវខាងកប៉ាល់ Titanic ក៏ស្ថិតនៅក្នុងចំណោមអ្នកដំណើរ ជិះនៅលើនាវាមុជទឹក Titan ផងដែរ។ លោក ណាហ្សេអូឡេ ធ្លាប់កាន់តួនាទីជានាយកផ្នែកស្រាវជ្រាវក្រោមបាតសមុទ្ររបស់ក្រុមហ៊ុន RMS Titanic Inc ហើយ បុរសម្នាក់នេះដែលជាអ្នកជំនាញថតរូបក្រោមបាតសមុទ្រដ៏ល្បីម្នាក់របស់បារាំងផងនោះ ធ្លាប់បានធ្វើដំណើររុករកទៅកាន់ទីតាំងខ្មោចកប៉ាល់ Titanic ចំនួន ៦លើកមកហើយ។

* លោក Stockton Rush

បើតាមគេហទំព័ររបស់ក្រុមហ៊ុន OceanGate លោក ស្ដុកតុន រ៉ាស (Stockton Rush) គឺជាស្ថាបនិក និងជា CEO ក្រុមហ៊ុន OceanGate មានមូលដ្នានក្នុង សហរដ្ឋអាមេរិក ហើយលោកគឺជាអ្នកបើកនាវaមុជទឹក Titan តែម្ដង។ លោក រ៉ាស បានបញ្ចប់ការសិក្សាផ្នែកវិស្វកម្មអវកាស នៅឯសាកលវិទ្យាល័យ Princeton និងទទួលបានសញ្ញាប័ត្រ MBA ពីសាកលវិទ្យាល័យ California។

គួរបញ្ជាក់ថា នាវាមុជទឹក Titan បានបាត់ខ្លួនកាលពីព្រឹកថ្ងៃអាទិត្យសប្ដាហ៍ ក្រោយដាច់ការ ទំនាក់ទំនងជាមួយនាវាគាំទ្រនៅលើផ្ទៃទឹក នៅឯតំបន់ឆ្នេរភាគអាគ្នេយ៍ នៃប្រទេសកាណាដា ខណៈកំពុងនាំភ្ញៀវទេសចរ ៤នាក់ ទៅទស្សនាបំណែកខ្មោច កប៉ាល់ Titanic។ កប៉ាល់យក្ស Titanic បានលិចចូលសមុទ្រ ក្នុងឆ្នាំ១៩១២ អំឡុងការធ្វើដំណើរកម្សាន្តមួយ ក្រោយបុកទង្គិចទៅនឹងផ្ទះទឹកកក ដោយបណ្ដាលឱ្យមនុស្សច្រើនជាង ១,៥០០នាក់បានស្លាប់៕