(មូស្គូ)៖ រុស្ស៊ីបានឱ្យដឹងនៅចន្ទនេះថា ខ្លួនបានរារាំងការវាយប្រហាររបស់អ៊ុយក្រែនទៅលើភូមិជាច្រើន ដែលហែកហួរដោយសង្រ្គាមនៅភាគអាគ្នេយ៍របស់ប្រទេសនេះ ដោយផ្ទុយនឹងការអះអាងរបស់កងកម្លាំងក្រុងកៀវ ដែលថាពួកគេបានដណ្តើមបានការតាំងទីលំនៅឡើងវិញ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី១២ ខែមិថុនា ឆ្នាំ២០២៣។

របាយការណ៍ផ្ទុយគ្នាពីទីក្រុងកៀវ និងទីក្រុងមូស្គូ កើតឡើងខណៈដែលអ្នកវិភាគនិយាយថា អ៊ុយក្រែនបានបើកការវាយបក ដែលគេទន្ទឹងរង់ចាំជាយូរមកហើយជាមួយនឹងអាវុធលោកខាងលិច ក្នុងគោលបំណងដណ្តើមយកទឹកដីដែលកាន់កាប់ដោយកងកម្លាំងរុស្ស៊ីមកវិញ។

ក្រសួងការពារជាតិរុស្ស៊ីបាននិយាយនៅថ្ងៃចន្ទនេះថា កងទ័ពរុស្ស៊ីបានរារាំំងការវាយប្រហាររបស់អ៊ុយក្រែនចំនួនបីលើក នៅជិតទីក្រុង Velyka Novosilka ដែលជាទីប្រជុំជនមួយនៅតំបន់ភាគខាងកើត នៃទីក្រុង Donetsk។

ក្រសួងនេះបាននិយាយនៅក្នុងសេចក្តីថ្លែងការណ៍មួយយ៉ាងដូច្នេះថា «សកម្មភាពសម្រេចចិត្តរបស់អង្គភាពការពារ ការបាញ់កាំភ្លើងធំ និងប្រព័ន្ធបាញ់ផ្លោងធុនធ្ងន់របស់ក្រុម Vostok បានរារាំងការវាយប្រហាររបស់សត្រូវចំនួនបី»។

ប្រភពដដែលនេះបានគូសបញ្ជាក់ទៀតថា ទាហានរុស្ស៊ីបានរារាំងការវាយប្រហាររបស់អ៊ុយក្រែន នៅភាគខាងលិចនៃទីក្រុង Velyka Novosilka ​ខាង​ត្បូង​នៃ Zaporizhzhia ផងដែរ។

អ៊ុយក្រែន​បាន​អះអាង​ក្នុង​ប៉ុន្មាន​ថ្ងៃ​ថ្មីៗ​នេះ​ថា កងកម្លាំងរបស់ខ្លួន​បាន​ចូល​ជ្រៅ ​ទៅ​ក្នុង​ទឹកដី​គ្រប់គ្រង​ដោយ​រុស្ស៊ី​ជុំវិញ​ទីក្រុង Velyka Novosilka ដោយ​ប្រកាស​ដណ្តើម​យក​ភូមិ​ចំនួន​បី​កាលពី​ចុង​សប្តាហ៍។ បន្ទាប់ពីមានការរំពឹងទុកជាច្រើនខែមក ប្រធានាធិបតីអ៊ុយក្រែន លោក Volodymyr Zelensky បានបញ្ជាក់កាលពីថ្ងៃសៅរ៍កន្លងទៅនេះថា ការវាយលុកប្រឆាំងនឹងកងកម្លាំងរុស្ស៊ីបានចាប់ផ្តើមហើយ។

ការអះអាងផ្ទុយគ្នារវាងពីទីក្រុងមូស្គូ និងកៀវមិនអាចផ្ទៀងផ្ទាត់ដោយឯករាជ្យបានទេ ប៉ុន្តែអ្នកវិភាគនិយាយថា អ៊ុយក្រែនប្រហែលជាមានការរីកចម្រើននាពេលថ្មីៗនេះ នៅក្បែរទីក្រុង Velyka Novosilka នៃខេត្ត Zaporizhzhia៕