(ប៉េកាំង)៖ នៅថ្ងៃសុក្រនេះ ទីក្រុងប៉េកាំងបានប្រកាសឱ្យដឹងថា ប្រធានាធិបតីប៉ាឡេស្ទីន លោក ម៉ាមូដ អាបាស់ (Mahmud Abbas) នឹងបំពេញទស្សនកិច្ចផ្លូវរដ្ឋមកកាន់ប្រទេសចិន នៅសប្តាហ៍ក្រោយនេះ បន្ទាប់ពីចិនបាននិយាយថា ខ្លួនត្រៀមលក្ខណៈរួចរាល់ជានិច្ច ដើម្បីជួយ​សម្របសម្រួលកិច្ចចរចាសន្តិភាព រវាងប៉ាឡេស្ទីននិងអ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៩ ខែមិថុនា ឆ្នាំ២០២៣។

អ្នកនាំពាក្យក្រសួងការបរទេសចិន លោកស្រី ហ័រ ឈុនយីង (Hua Chunying) បានលើកឡើងយ៉ាងដូច្នេះថា «តបតាមការអញ្ជើញរបស់​ប្រធានាធិបតីចិន លោក ស៉ី ជិនពីង ប្រធានាធិបតីប៉ាឡេស្ទីន លោក ម៉ាមូដ អាបាស់ នឹងមកធ្វើទស្សនកិច្ចផ្លូវរដ្ឋនៅប្រទេសចិន ចាប់ពីថ្ងៃទី១៣ ដល់ថ្ងៃទី១៦ ខែមិថុនា»។ រដ្ឋមន្រ្តីការបរទេសចិន លោក ឈិន ហ្កាង (Qin Gang) កាលពីខែមេសាកន្លងទៅ បានប្រាប់សមភាគីអ៉ីស្រាអែល និងប៉ាឡេស្ទីនរបស់លោកថា ប្រទេសចិនស្ម័គ្រចិត្តផ្តល់ការជួយជ្រោមជ្រែងដល់ ដំណើរការចរចាសន្តិភាពរវាងភាគីទាំងពីរ ដែលបានបន្តជាប់គាំងតាំងតែពីឆ្នាំ២០១៤ រហូតមក។

គួរបញ្ជាក់ថា មួយរយៈចុងក្រោយនេះ ចិនបាននិងកំពុងស្ថិតក្នុងការធ្វើយុទ្ធនាការការទូតយ៉ាងសស្រាក់សស្រាំ ដោយទើបតែជួយសម្រេចបាន នូវការ​ផ្សះផ្សាទំនាក់ទំនងឡើងវិញកាលពីខែមីនា រវាងប្រទេសអ៉ីរ៉ង់និងអារ៉ាប៊ីសាអូឌីត។ វាជាបញ្ចប់ជម្លោះការទូតនឹងគ្នាចាប់តាំងពីឆ្នាំ២០១៦ រវាងទីក្រុងតេហេរ៉ង់និងទីក្រុងរីយ៉ាដ ហើយក៏ជាសញ្ញាមួយផងដែរ បង្ហាញពីការកើនឡើងឥទ្ធិពលចិននៅមជ្ឈិមបូព៌ា ជាតំបន់ដែលធ្លាប់តែស្ថិតនៅក្រោមឥទ្ធិពល របស់សហរដ្ឋអាមេរិកជាចម្បង អស់រយៈពេលរាប់ទសវត្សរ៍មកហើយ៕