(ម៉ូហ្គាឌីស៊ូ)៖ ពួកយុទ្ធជនមកពីក្រុមឧទ្ទាមសូម៉ាលី Al-Shabaab បានវាយប្រហារមូលដ្ឋានយោធាមួយនៅជាយក្រុងភាគកណ្តាលប្រទេស ដោយបានសម្លាប់មនុស្សយ៉ាងហោចណាស់ ១៧នាក់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី៣០ ខែឧសភា ឆ្នាំ២០២៣។

ការវាយប្រហារនេះបានកើតឡើងនៅក្រុង Masagawa ​ដែលស្ថិតនៅចម្ងាយប្រហែល ៣០០គីឡូម៉ែត្រ ភាគខាងជើងនៃទីក្រុង Mogadishu ប៉ុន្មានថ្ងៃបន្ទាប់ពីក្រុមឧទ្ទាមភេរវកម្មនេះ បានវាយប្រហារមូលដ្ឋានទ័ពប្រទេសអ៊ូហ្គង់ដា នៃកងរក្សាសន្តិភាពសហភាពអាហ្វ្រិកនៅទីក្រុង Bulamarer ស្ថិតភាគនិរតីនៃរដ្ឋធានីរបស់ប្រទេសនេះ។

លោក Hussein Nur អ្នកស្រុក Masagawa បាននិយាយតាមទូរសព្ទថា «ខ្ញុំបានឃើញមនុស្ស ១៧នាក់បានស្លាប់ រួមទាំងអ្នកវាយប្រហារ និងអ្នករងការវាយប្រហារ។ ទីក្រុង​នេះ​មានភាពស្ងប់ស្ងាត់ ហើយ​ស្ថិត​ក្រោម​ការ​គ្រប់​គ្រង​របស់​រដ្ឋាភិបាល»។

អនុសេនីយ៍ឯក លោក Abdullah Mohammed មន្ត្រីយោធាក្នុងក្រុង Masagawa បានបញ្ជាក់អំពីការវាយប្រហារនេះ ហើយបាននិយាយថា ប្រយុទ្ធជន al Shabaab​ ចំនួន ១២នាក់ត្រូវបានសម្លាប់ ប៉ុន្តែគាត់មិនដឹងថា មានមនុស្សសរុបប៉ុន្មាននាក់បានស្លាប់នោះទេ។

លោក Mohammad បានគូសបញ្ជាក់ថា «ការប្រយុទ្ធគ្នាយ៉ាងខ្លាំងក្លាបានបន្តអស់រយៈពេលជាច្រើនម៉ោងនៅតាមជាយក្រុង។ រហូតមកដល់ពេលនេះ ខ្ញុំគ្រាន់តែដឹងថាយើងបានបាត់បង់ទាហាន ប៉ុន្តែខ្ញុំមិនមានចំនួនពិតប្រាកដនោះទេ។ យើងបានវាយលុកក្រុម al-Shabab ហើយឥឡូវនេះយើងកំពុងរុញច្រានពួកគេចូលទៅក្នុងព្រៃវិញ»។

គួរបញ្ជាក់ថា ចលនា Al-Shabaab ដែលមានទំនាក់ទំនងនឹងក្រុមអាល់កៃដា បាននិងកំពុងបើកការប្រយុទ្ធតាំងពីឆ្នាំ២០០៦ ដើម្បីផ្តួលរំលំរដ្ឋាភិបាលកណ្តាលរបស់ប្រទេសសូម៉ាលី និងបង្កើតការគ្រប់គ្រងរបស់ខ្លួនដោយផ្អែកលើការបកស្រាយយ៉ាងតឹងរឹងនៃច្បាប់អ៊ីស្លាម។ ក្រុមនេះតែងតែបានបើកការវាយប្រហារធំៗទៅលើសណ្ឋាគារ មូលដ្ឋានយោធា និងស្ថាប័នរដ្ឋាភិបាលជាដើម៕