(មូស្គូ)៖ ក្រុមមន្រ្តីនៃប្រទេសរុស្ស៉ី បានឱ្យដឹងនៅថ្ងៃអង្គារនេះថា យន្តហោះដ្រូនបានហោះបុកអគារមួយចំនួន នៅទីក្រុងមូស្គូ ប៉ុន្តែវាបានបង្កឱ្យ​មានការខូចខាតតិចតួចប៉ុណ្ណោះ ហើយពុំបានបណ្តាលឱ្យមានមនុស្សរងរបួសឡើយ ខណៈប្រព័ន្ធការពារដែនអាកាស ក៏បានបាញ់កម្ទេចដ្រូនប៉ុន្មាន​គ្រឿងផ្សេងទៀត ដែលហោះសំដៅឆ្ពោះមករករដ្ឋធានីរបស់រុស្ស៉ី ផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី៣០ ខែឧសភា ឆ្នាំ២០២៣។

អភិបាលទីក្រុងមូស្គូ លោក សឺហ្គៃ សូប្យានីន (Sergei Sobyanin) បាននិយាយថា អគារ២ខ្នងដែលរងការខូចខាតក្នុងការវាយ​ប្រហារ ត្រូវបានជម្លៀសមនុស្សចេញ។ ក្រោយមក លោក អាន់ឌ្រៃ វ៉ូរ៉ូបយូវ (Andrei Vorobyov) អភិបាលតំបន់មូស្គូ បានឱ្យដឹងថា យន្តហោះ​ដ្រូនប៉ុន្មានគ្រឿង ត្រូវបានបាញ់កម្ទេច ពេលដែលពួកវាកំពុងហោះសំដៅទៅរក ទីក្រុងមូស្គូ។ វាមិនទាន់ច្បាស់ទេថា តើនរណាជាអ្នកនៅពី​ក្រោយការវាយប្រហារដោយដ្រូននោះ ប៉ុន្តែវាគឺជាករណីវាយប្រហារលើកទី២ហើយនៅទីក្រុងមូស្គូ បន្ទាប់ពីក្នុងខែដដែលនេះ អាជ្ញាធររុស្ស៉ីបានអះអាងថា មានដ្រូន២គ្រឿងបានវាយប្រហារលើវិមានក្រឹមឡាំង ក្នុងសកម្មភាពដែលទីក្រុងមូស្គូចាត់ទុកថា ជាការប៉ុនប៉ងធ្វើឃាតលើ ប្រធានាធិបតីរុស្ស៉ី លោក វ៉្លាឌីមៀ ពូទីន។

គួរបញ្ជាក់ថា រីឯរដ្ឋធានីកៀវរបស់អ៊ុយក្រែនឯណោះវិញ ក៏បានបន្តរងការវាយប្រហារតាមផ្លូវអាកាស ពីសំណាក់កងកម្លាំងរុស្ស៉ីផងដែរ នាថ្ងៃអង្គារនេះ ខណៈមនុស្សម្នាក់បានបាត់បង់ជីវិត និង៣នាក់បានរងរបួស បន្ទាប់ពីអគារខ្ពស់មួយបានរងការឆាបឆេះ។ រុស្សីបានបង្កើន​ការវាយប្រហារជាថ្មីដោយប្រើដ្រូន និងមីស៉ីលទៅលើទីក្រុងកៀវ និងតំបន់មួយចំនួនទៀតរបស់អ៊ុយក្រែន ចាប់តាំងតែពីថ្ងៃអាទិត្យចុងសប្តាហ៍​កន្លងមកនេះ៕