(កៀវ)៖ នៅថ្ងៃអង្គារនេះ អ៊ុយក្រែនបានអះអាងថា ខ្លួនបានបាញ់ទម្លាក់មីស៉ីលល្បឿនលឿនជាងសំឡេង ចំនួន៦គ្រាប់ទៀត កំលុងការវាយប្រហារតាមផ្លូវអាកាសរបស់រុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៦ ខែឧសភា ឆ្នាំ២០២៣។

រដ្ឋមន្រ្តីការពារជាតិអ៊ុយក្រែន លោក អូឡិចស៉ី រេសនីកូវ (Oleksiy Reznikov) បាននិយាយយ៉ាងដូច្នេះថា «ជោគជ័យមិនគួរឱ្យជឿ​មួយទៀតហើយ សម្រាប់កងទ័ពអាកាសអ៊ុយក្រែន! កាលពីយប់មិញ កងកម្លាំងការពារដែនអាកាសរបស់យើង បានបាញ់ទម្លាក់មីស៉ីល​ល្បឿនលឿនជាងសំឡេង Kinzhal របស់រុស្ស៉ីចំនួន៦គ្រាប់ និងមីស៉ីលដទៃទៀតចំនួន១២គ្រាប់»។ កាលពីមួយសប្តាហ៍មុន អ៊ុយក្រែន​បានអះអាងថា ខ្លួនបាញ់ស្កាត់មីស៉ីល Kinzhal បានជាលើកដំបូង ដោយប្រើប្រាស់ប្រព័ន្ធការពារដែនអាកាស ប៉ាទ្រីយ៉ូត (Patriot) ដែលបានមកពីសហរដ្ឋអាមេរិក។

នៅថ្ងៃអង្គារនេះ អ៊ុយក្រែនបានអះអាងថា ខ្លួនបានបាញ់កម្ទេចមីស៉ីលទាំង១៨គ្រាប់ និងដ្រូនទាំង៩គ្រឿង ដែលរុស្ស៉ីបានបាញ់បញ្ជូនមកកាលពី​វេលាយប់រំលងអធ្រាត្រ។ អ៊ុយក្រែនពុំបានបញ្ជាក់ទេថា ខ្លួនបានប្រើប្រាស់ប្រព័ន្ធការពារដែនអាកាសប្រភេទណា ក្នុងការបាញ់​ស្កាត់ មីស៉ីល Kinzhal ៦គ្រាប់ខាងលើ។ ទីក្រុងកៀវបានស្នើសុំឱ្យ សម្ព័ន្ធមិត្តលោកខាងលិច ជួយពង្រឹងសមត្ថភាពការពារដែនអាកាសរបស់ខ្លួន ស្របពេលដែលរុស្ស៉ីបានចាប់ផ្តើមបើកការវាយប្រហារតាមផ្លូវអាកាស កាលពីកំលុងរដូវរងាកន្លងទៅ។

គួរបញ្ជាក់ថា ប្រធានាធិបតីរុស្ស៉ីលោក វ៉្លាឌីមៀ ពូទីន បានបង្ហាញចេញមីស៉ីល Kinzhal ជាលើកដំបូងកាលពីឆ្នាំ២០១៨ ហើយបាន​ពិពណ៌នាវាថា ជាអាវុធគ្មានគូប្រៀបមួយ ដែលពិបាកក្នុងការបាញ់ស្ទាក់ជាទីបំផុត ដោយប្រព័ន្ធការពារដែនអាកាសនានារបស់ពិភពលោក នាពេលបច្ចុប្បន្ន។ Kinzhal គឺជាមីស៉ីលបាលិស្ទីគដែលបាញ់ចេញពីយន្តហោះ ហើយអាចធ្វើដំណើរក្នុងល្បឿនរហូតដល់ Mach 10 ដែលលឿនជាងល្បឿនសំឡេង១០ដង ឬស្មើនឹង១២,៣៥០គីឡូម៉ែត្រក្នុងមួយម៉ោង និងមានសមត្ថភាពផ្ទុកក្បាលគ្រាប់ធម្មតាក៏បាន ឬក្បាលគ្រាប់នុយក្លេអ៊ែរក៏បាន។ មីស៉ីលនេះត្រូវ​គេរាយការណ៍ថា អាចបាញ់បានចម្ងាយចន្លោះ១,៥០០-២,០០០គីឡូម៉ែត្រ៕