(វ៉ាស៉ីនតោន)៖ អាជ្ញាធរអាមេរិកបានឱ្យដឹងថា កាលពីថ្ងៃចន្ទសប្តាហ៍នេះ ខ្មាន់កាំភ្លើងអាយុ១៨ឆ្នាំម្នាក់ បានធ្វើសកម្មភាពបាញ់ប្រហារ នៅសហគមន៍មួយក្នុងរដ្ឋញូម៉ិកស៉ិក (New Mexico) ដោយហាក់គ្មានគោលដៅច្បាស់លាស់ឡើយ​ ពោលគឺជនសង្ស័យបានបាញ់ទៅលើ អ្នកដើរតាមផ្លូវ លំនៅឋាន និងយានជំនិះជាដើម ហើយជាលទ្ធផលបានបណ្តាលឱ្យ មនុស្ស៣នាក់បាត់បង់ជីវិត និង៦នាក់ទៀតរបួស មុនពេលត្រូវបានប៉ូលិសបាញ់សម្លាប់ នៅក្រៅព្រះវិហារមួយកន្លែង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៦ ខែឧសភា ឆ្នាំ២០២៣។

ហេតុការណ៍បាញ់ប្រហារខាងលើ បានកើតឡើងក្នុងទីក្រុងហ្វាមីងតុន (Farmington)។ ប្រជាជនស៉ីវិល៣នាក់បានស្លាប់ ខណៈស្ថិតក្នុងចំណោម​អ្នករងរបួស ក៏មានមន្រ្តីប៉ូលិស ២នាក់ផងដែរ ដែលបានរងរបួសកំលុងការបាញ់តទល់ជាមួយជនសង្ស័យ មុនពេលខ្មាន់កាំភ្លើងរូបនោះ ត្រូវបានបាញ់សម្លាប់។ ស្នងការប៉ូលិសក្រុងហ្វាមីងតុន លោក ស្ទីវ ហេប (Steve Hebbe) បាននិយាយថា ភ្លាមៗនេះសកម្មភាពបាញ់ប្រហារនោះ ហាក់ត្រូវបានធ្វើឡើងដោយពុំមានចេតនាជាក់លាក់ឡើយ។ បើតាមលោក Hebbe ជនសង្ស័យ​បានប្រើអាវុធយ៉ាងហោច៣ដើម ក្នុងការធ្វើសកម្មភាពរបស់ខ្លួន ក្នុងនោះរួមមានទាំងកាំភ្លើងវែង AR-15 ហើយផ្ទះយ៉ាងហោច៦ខ្នង និង​រថយន្ត៣គ្រឿង ត្រូវបានគ្រាប់កាំភ្លើងបាញ់ចំ។

គួរបញ្ជាក់ថា យោងតាមអង្គការ Gun Violence Archive មកទល់ពេលនេះ មានករណីបាញ់ប្រហារបង្កឱ្យមានមនុស្សស្លាប់ឬរបួស ចាប់ពី៤នាក់ឡើងទៅ នៅក្នុងសហរដ្ឋអាមេរិកនាឆ្នាំ២០២៣នេះ យ៉ាងហោច២២៥ករណីហើយ៕