(វ៉ាស៊ីនតោន)៖ សេតវិមានបានបដិសេធការជាប់ពាក់ព័ន្ធណាមួយ ក្នុងការវាយប្រហារដោយយន្តហោះគ្មានមនុស្សបើកលើវិមានក្រឹមឡាំង បន្ទាប់ពីអ្នកនាំពាក្យរុស្ស៊ី លោក Dmitry Peskov បានចោទប្រកាន់ក្រុងវ៉ាស៊ីនតោនថា បានដឹកនាំអ៊ុយក្រែនឱ្យធ្វើការវាយប្រហារនេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី០៤ ខែឧសភា ឆ្នាំ២០២៣។
លោក John Kirby អ្នកនាំពាក្យក្រុមប្រឹក្សាសន្តិសុខជាតិសេតវិមានបាននិយាយថា «យើងមិនមានអ្វីជាប់ពាក់ព័ន្ធជាមួយរឿងនេះទេ»។ លោកបានបន្ថែមថា « លោក Peskov តែងតែកុហកបែបហ្នឹងជារឿងធម្មតា»។
រុស្ស៊ីបានអះអាងថា អ៊ុយក្រែនបានធ្វើការវាយប្រហារភេរវកម្មកាលពីយប់ថ្ងៃអង្គារ ជាមួយនឹងយន្តហោះគ្មានមនុស្សបើកពីរគ្រឿង ក្នុងគោលបំណងធ្វើឃាតលោកប្រធានាធិបតី វ្ល៉ាឌីមៀ ពូទីន ដែលការចោទប្រកាន់នេះត្រូវបានក្រុងកៀវបដិសេធ។
លោក Peskov លេខាធិការសារព័ត៌មានយូរឆ្នាំរបស់ លោក ពូទីន បាននិយាយកាលពីថ្ងៃពុធថា «ការសម្រេចចិត្តលើការវាយប្រហារបែបនេះមិនត្រូវបានធ្វើឡើងនៅក្រុងកៀវទេ ប៉ុន្តែនៅទីក្រុងវ៉ាស៊ីនតោន»។ លោកបានបន្ថែមថា «ក្រុងកៀវធ្វើតែអ្វីដែលគេ (សហរដ្ឋអាមេរិក) ស្នើឲ្យធ្វើ»។
គួរបញ្ជាក់ថា ខាងទីក្រុងកៀវបានចេញមុខបដិសេធថា ខ្លួនមិនមានជាប់ទាក់ទងក្នុងឧប្បត្តិហេតុ ដែលបានកើតឡើងកាលពីថ្ងៃពុធសប្តាហ៍នេះឡើយ នៅពេលឃ្លីបវីដេអូមួយបានបង្ហាញឱ្យឃើញវត្ថុហោះហើរចំនួនពីរ សំដៅទៅរកវិមានក្រឹមឡាំង ហើយវត្ថុមួយក្នុងចំណោមនោះ ក៏បានផ្ទុះឡើង។ វិមានក្រឹមឡាំងបានអះអាងថា ខ្លួនរក្សាសិទ្ធិដើម្បីសងសឹកឆ្លើយតបទៅវិញ ប៉ុន្តែមិនបាននិយាយថា សកម្មភាពតបតនោះនឹងធ្វើឡើងក្នុងទម្រង់បែបណាទេ៕
