(ហ្សឺណែវ)៖ កាលពីថ្ងៃពុធសប្តាហ៍នេះ អង្គការសុខភាពពិភពលោក (WHO) បាននិយាយថា ការបាត់បង់ជីវិតដោយសារជំងឺកូវីដ១៩ បានថយចុះដល់ទៅ៩៥ភាគរយ គិតចាប់តាំងពីដើមឆ្នាំនេះ ប៉ុន្តែបានព្រមានថា វីរុសនេះនៅតែកំពុងបន្តសកម្មភាពនៅឡើយទេ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៧ ខែមេសា ឆ្នាំ២០២៣។

ប្រមុខអង្គការ WHO លោក តេដ្រូស អាដាណូម ហ្កេប្រេយេស៊ូស (Tedros Adhanom Ghebreyesus) បាននិយាយដូច្នេះថា «យើងពិតជាត្រេកអរណាស់ ចំពោះការបន្តថមថយជាលំដាប់នៃសេចក្តីរាយការណ៍ អំពីករណីស្លាប់ដោយសារកូវីដ១៩ ដែលបាន​ធ្លាក់ចុះរហូតដល់៩៥ភាគរយ ចាប់តាំងតែពីដើមឆ្នាំនេះ។ ទោះជាយ៉ាងនេះក្តី ប្រទេសខ្លះនៅកំពុងមើលឃើញការកើនឡើង ហើយក្នុង​រយៈពេល៤សប្តាហ៍ចុងក្រោយនេះ មនុស្សសរុប១៤,០០០នាក់ បានបាត់បង់ជីវិតដោយសារកូវីដ។ ម៉្យាងវិញទៀត ដូចដែលការ​លេចឡើងនៃវីរុសកូវីដបំប្លែងថ្មី XBB.1.16 បានស្តែងឱ្យឃើញយ៉ាងដូច្នោះ គឺវីរុសនេះកំពុងបន្តមានការប្រែប្រួល ហើយនៅអាចមាន​សមត្ថភាពបង្ករលកឆ្លងរាលដាល ក៏ដូចជាការស្លាប់ថ្មីៗបន្តទៀត»។

លោក ថេដ្រូស បានគូសបញ្ជាក់ជាថ្មីថា អង្គការសុខភាពពិភពលោក នៅតែមានក្តីសង្ឃឹមថា នឹងអាចប្រកាសបិទបញ្ចប់ជំងឺកូវីដ១៩ ជាភាពអាសន្នផ្នែកសុខភាពសាធារណៈជាអន្តរជាតិ ខណៈគណៈកម្មាធិការដែលផ្តល់ប្រឹក្សាឱ្យរូបលោក ស្តីពីស្ថានភាពគ្រាអាសន្ន​នេះ នឹងត្រូវជួបប្រជុំនៅខែក្រោយ សម្រាប់កិច្ចប្រជុំជាប្រចាំរៀងរាល់ត្រីមាសរបស់ខ្លួន។

គួរបញ្ជាក់ថា គិតចាប់តាំងពីករណីដំបូងត្រូវបានរាយការណ៍ កាលពីចុងឆ្នាំ២០១៩ រហូតមកទល់ពេលនេះ កូវីដ១៩ បានផ្តាច់ជីវិតមនុស្ស​សរុប៦.៨៦លាននាក់ បើតាមតាមវែបសាយ worldometers នៅទូទាំងពិភពលោក រីឯករណីឆ្លងគឺជាង៦៨៦លាននាក់៕