(ស្តុកខុល)៖ ទីភ្នាក់ងារអវកាសរបស់ស៊ុយអែត Sweden Space Corp (SSC) បានឱ្យដឹងកាលពីថ្ងៃអង្គារសប្តាហ៍នេះថា រ៉ុក្កែតស្រាវជ្រាវ​មួយគ្រាប់ ដែលខ្លួនបានបាញ់ចេញពីមជ្ឈមណ្ឌលអវកាស អេសស្រេង (Esrange Space Center) នៅភាគខាងជើងប្រទេសស៊ុយអែត បានជួបបញ្ហាហើយធ្លាក់ចូល១៥គីឡូម៉ែត្រ ទៅក្នុងទឹកដីប្រទេសន័រវែស ដែលនៅក្បែរគ្នា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី២៦ ខែមេសា ឆ្នាំ២០២៣។

ទីភ្នាក់ងារ SSC បាននិយាយថា រ៉ុក្កែតខាងលើបានហោះឡើងដល់រយៈកម្ពស់២៥០គីឡូម៉ែត្រ ជាទីដែលការងារពិសោធផ្សេងៗ ត្រូវបានធ្វើ​ឡើង ក្នុងស្ថានភាពមិនមានកម្លាំងទំនាញរបស់ផែនដី។ បើតាមអ្នកនាំពាក្យ SSC វាបានធ្លាក់ចំតំបន់ជួរភ្នំនៅកម្ពស់១,០០០ម៉ែត្រ និងស្ថិត​នៅចម្ងាយ១០គីឡូម៉ែត្រ ពីតំបន់ដែលមានមនុស្សរស់នៅកៀកបំផុត។ ទីភ្នាក់ងារ SSC បានបន្តថា ការងារដើម្បីទៅយករ៉ុក្កែតនោះមកវិញ កំពុងតែប្រព្រឹត្តទៅ ហើយការស៉ើបអង្កេតក៏កំពុងត្រូវធ្វើឡើង ដើម្បីកំណត់ពីបញ្ហាបច្ចេកទេស ដែលបានកើតឡើងផងដែរ។

ដោយឡែក អ្នកនាំពាក្យក្រសួងការបរទេសន័រវែស បាននិយាយថា អាជ្ញាធរន័រវែសយកចិត្តទុកដាក់ជាខ្លាំង ចំពោះសកម្មភាពមិនមានការ​អនុញ្ញាតណាមួយ នៅក្នុងព្រំប្រទល់របស់ប្រទេសន័រវែស។ ក្នុងករណីមានការបំពានព្រំដែន អ្នកដែលទទួលខុសត្រូវគួរជូនដំណឹងភ្លាមៗមក​កាន់អាជ្ញាធរន័រវែស រួមមានទាំងក្រសួងការបរទេស ហើយតាមរយៈច្រកទាក់ទងត្រឹមត្រូវ។ ក្រសួងការបរទេសន័រវែស​ មិនទាន់ទទួលបានការជូនដំណឹងជាផ្លូវការណាមួយ អំពីឧប្បត្តិហេតុខាងលើពីអាជ្ញាធរស៊ុយអែតនៅឡើយទេ។

គួរបញ្ជាក់ថា យោងតាមអ្នកនាំពាក្យខាងលើ ការងារនៅក្នុងទឹកដីន័រវែស ដើម្បីប្រមូលយកវត្ថុដែលធ្លាក់ណាមួយ ចាំបាច់ត្រូវមានការយល់​ព្រមជាមុនពីខាងស៊ុយអែត។ ក្រសួងការបរទេសន័រវែសថា ខ្លួនមិនទាន់ដឹងថា មានការខូចខាតដែលបង្កឡើងពី ការធ្លាក់រ៉ុក្កែតរបស់​ស៊ុយអែតដែរឬយ៉ាងណាទេ៕