(មូស្គូ)៖ វិមានក្រឹមឡាំងបានចេញមុខច្រានចោល នូវអ្វីដែលខ្លួនចាត់ទុកជាពាក្យភូតកុហក ដែលថាប្រធានាធិបតីរុស្ស៉ី លោក វ៉្លាឌូមៀ ពូទីន មានបុគ្គលដែលមានមុខមាត់ស្រដៀងគ្នា សម្រាប់ដើរតួជំនួសមេដឹកនាំវ័យ៧០រូបនេះ និងថារូបលោកបានចំណាយពេលភាគច្រើន ស្ថិតក្នុង​លេណដ្ឋាននុយក្លេអ៊ែរ ដើម្បីការពារខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី២៦ ខែមេសា ឆ្នាំ២០២៣។

កាលពីថ្ងៃចន្ទសប្តាហ៍នេះ អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បាននិយាយដូច្នេះថា «អ្នកទាំងអស់គ្នាប្រហែលធ្លាប់លឺហើយថា លោក ពូទីន មានបុគ្គលដែលមានមុខមាត់ស្រដៀងលោកជាច្រើន ដែលដើរតួជំនួសខណៈលោក​សំងំខ្លួនក្នុងលេណដ្ឋាន។ វាគឺជាពាក្យភូតកុហកសុទ្ធសាធ។ លោក ពូទីន មានថាមពលមាំមួន និងសុខភាពរឹងមាំ ហើយលោកមិនបានអង្គុយសំងំនៅក្នុងលេណដ្ឋានណាមួយឡើយ»។ វិមានក្រឹមឡាំងធ្លាប់បានចេញមុខទាត់ចោលជាច្រើនលើក នូវការសង្ស័យថាលោក ពូទីន ដែលជាមេដឹកនាំ​រុស្ស៉ីចាប់តាំងពីឆ្នាំ១៩៩៩មក បានធ្លាក់ខ្លួនឈឺ។

អំលុងទស្សនកិច្ចផ្លូវរដ្ឋមកកាន់ទីក្រុងមូស្គូកាលពីខែមីនា ប្រធានាធិបតីចិន លោក ស៉ី ជិនពីង បានប្រាប់លោក ពូទីន ថា រូបលោកជឿថា ប្រជាជនរុស្ស៉ីនឹងបន្តគាំទ្រលោក ពូទីន ជាថ្មីម្តងទៀត ក្នុងការបោះឆ្នោតជ្រើសរើសប្រធានាធិបតីរុស្ស៉ី ដែលត្រូវធ្វើឡើងនៅឆ្នាំ២០២៤។ យ៉ាងណាមិញ លោក ពូទីន ផ្ទាល់ មិនទាន់បាននិយាយនៅឡើយទេថា តើលោកនឹងស្វែងរកការកាន់អំណាចបន្តទៀតឬយ៉ាងណា។

គួរបញ្ជាក់ថា នៅពេលឡើងកាន់អំណាចដំបូង លោក ពូទីន បានប្តេជ្ញាបញ្ចប់ភាពវឹកវរដែលបានញាំញីប្រទេសរុស្ស៉ី ក្រោយសម័យសូវៀតកាល​ពីអំលុងទសវត្សរ៍ឆ្នាំ១៩៩០ ប៉ុន្តែសង្រ្គាមឈ្លានពាននៅអ៊ុយក្រែន គឺជាវិបត្តិយោធាដ៏ធ្ងន់ធ្ងរបំផុត ដែលរូបលោកបានប្រឈមគិតចាប់តាំង​ពីសង្រ្គាមសូវៀត-អាហ្វហ្កានីស្ថាន ឆ្នាំ១៩៧៩-១៩៨៩។ វិបត្តិអ៊ុយក្រែនបានរុញច្រានរុស្ស៉ីឱ្យស្ថិតក្រោមការប្រឈមមុខគ្នាដ៏តានតឹងបំផុតជាមួយលោកខាងលិច គិតចាប់តាំងពីវិបត្តិមីស៉ីលគុយបាឆ្នាំ១៩៦២ ហើយលោក ពូទីន បានប្តេជ្ញាថា នឹងងាកចេញពីលោកខាងលិច ដើម្បីឆ្ពោះទៅរកចិនឱ្យកាន់តែខ្លាំងវិញ៕