(តូក្យូ)៖ ក្រុមហ៊ុនជប៉ុន ispace បានប្រកាសថា ការព្យាយាមរបស់ខ្លួន ក្នុងការចុះចតយានរ៉ូបូតឈ្មោះថា Hakuto-R M1 ទៅលើ​ផ្ទៃព្រះចន្ទ កាលពីយប់ថ្ងៃអង្គារសប្តាហ៍នេះ គឺទទួលបរាជ័យ ដោយការទាក់ទងបានដាច់ ហើយយានរ៉ូបូតនោះទំនងជាបានធ្លាក់​ទៅបុក ផ្ទៃព្រះចន្ទពេញទំហឹងតែម្តង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី២៦ ខែមេសា ឆ្នាំ២០២៣។

លោក តាកេស៉ិ ហាកាម៉ាដា (Takeshi Hakamada) ដែលជាស្ថាបនិកនិងជានាយកប្រតិបត្តិ ispace បាននិយាយយ៉ាងដូច្នេះថា «យើងបានដាច់ការទាក់ទងជាមួយ យានរបស់យើង ដូច្នេះយើងមានតែសន្និដ្ឋានថា យើងមិនអាចសម្រេចបាន ការចុះចតដោយជោគជ័យ​នៅលើឋានព្រះចន្ទទេ»។ ប្រសិនបើកិច្ចប្រឹងប្រែងរបស់ក្រុមហ៊ុន ispace ទទួលបានជោគជ័យវិញនោះ វានឹងជាលើកដំបូងបំផុត ដ្បិតមក​ទល់ពេលនេះ មិនទាន់មានក្រុមហ៊ុនឯកជនណា បាននាំយកយានរ៉ូបូតទៅដល់លើផ្ទៃះព្រះចន្ទ ដោយសុវត្ថិភាពនៅឡើយទេ។

គួរបញ្ជាក់ថា យាន Hakuto-R M1 ត្រូវបានបញ្ជូនចេញពីផែនដី តាមរយៈរ៉ុក្កែតរបស់ក្រុមហ៊ុនអវកាសឯកជនអាមេរិក SpaceX កាល​ពីចុងឆ្នាំមុន ហើយបានទៅដល់ក្បែរឋានព្រះចន្ទ កាលពីខែមីនា។ មានតែសហរដ្ឋអាមេរិក អតីតសហភាពសូវៀត (រុស្ស៉ី) និងចិនប៉ុណ្ណោះ ដែលធ្លាប់ចុះចតយានរ៉ូបូត ដោយជោគជ័យទៅកាន់ទីនោះ នៅក្រោមកម្មវិធីដែលឧបត្ថម្ភដោយរដ្ឋាភិបាល ខណៈការព្យាយាមប៉ុន្មានឆ្នាំកន្លងទៅនេះ ដោយរដ្ឋាភិបាលឥណ្ឌានិងដោយ​​ក្រុមហ៊ុនឯកជនមួយរបស់អ៉ីស្រាអែល ដើម្បីធ្វើយ៉ាងដូច្នោះ គឺបានបញ្ចប់ទៅដោយភាពបរាជ័យ ដូចជាក្រុមហ៊ុន ispace ដែរ៕