(តូក្យូ)៖ ក្នុងថ្ងៃអង្គារនេះ ក្រុមហ៊ុនជប៉ុនមួយនឹងព្យាយាមសម្រេចឱ្យបាន នូវគោលដៅនៃការក្លាយខ្លួនជាក្រុមហ៊ុនឯកជនដំបូងគេបង្អស់ ដែលចុះចតយានរ៉ូបូត ដោយជោគជ័យទៅលើផ្ទៃព្រះចន្ទ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី២៥ ខែមេសា ឆ្នាំ២០២៣។

ប្រសិនបើអ្វីៗប្រព្រឹត្តទៅតាមការគ្រោងទុក យានចុះចត Hakuto-R Mission 1 របស់ក្រុមហ៊ុន ispace នឹងចាប់ផ្តើមការបន្ទាបខ្លួនរបស់វា ចុះទៅរកផ្ទៃព្រះចន្ទ នៅខ្ទង់ម៉ោងជិត១១-១២យប់ថ្ងៃអង្គារនេះ (ម៉ោងនៅភ្នំពេញ) ដែលត្រូវនឹងវេលាយប់រំលងអធ្រាត្រឈានចូលថ្ងៃពុធ នៅទីក្រុងតូក្យូ។ យ៉ាងណាក្តី ជោគជ័យនៃការចុះចត គឺមិនអាចធានាបានឡើយ ដ្បិតកាលពីខែមេសា ឆ្នាំ២០១៩ អង្គការ SpaceIL របស់អ៉ីស្រាអែល បានមើលឃើញយានរ៉ូបូតរបស់ខ្លួន ធ្លាក់ទៅបុកលើផ្ទៃព្រះចន្ទ កំលុងការព្យាយាមចុះចតនាពេលនោះ។

ក្រុមហ៊ុន ispace ក៏បានប្រកាសពីជម្រើសបម្រុងចំនួន៣ផ្សេងទៀត នៃទីតាំងសម្រាប់ចុះចត ហើយកាលបរិច្ឆេទអាចនឹងត្រូវផ្លាស់ប្តូរទៅ​ថ្ងៃទី២៦ ខែមេសា, ថ្ងៃទី១ ខែឧសភា ឬក៏ ថ្ងៃទី៣ ខែឧសភា ដោយអាស្រ័យលើលក្ខខណ្ឌជាក់ស្តែង។ យានរ៉ូបូតរបស់ក្រុមហ៊ុន ispace ដែលមានកម្ពស់ជាង២ម៉ែត្រនិងទម្ងន់៣៤០គីឡូក្រាម បាននិងកំពុងគោចរនៅជុំវិញព្រះចន្ទ ចាប់តាំងពីខែមីនាមក។ វាត្រូវបាន​បញ្ជូនចេញពីផែនដី កាលពីខែធ្នូ ឆ្នាំ២០២២ តាមរយៈរ៉ុក្កែត Falcon 9 របស់ក្រុមហ៊ុនអវកាសឯកជនអាមេរិក SpaceX។

គួរបញ្ជាក់ថា មកទល់សព្វថ្ងៃនេះ មានតែប្រទេសចំនួន៣ប៉ុណ្ណោះ គឺសហរដ្ឋអាមេរិក រុស្ស៉ី និងចិន ដែលបាននាំ​យកយានរ៉ូបូតទៅដល់ផ្ទៃព្រះចន្ទ ដោយជោគជ័យ ប៉ុន្តែសុទ្ធតែតាមរយៈកម្មវិធីដែលឧបត្ថម្ភដោយរដ្ឋាភិបាលទាំងអស់៕