(មូស្គូ)៖ អភិបាលតំបន់ដែលតែងតាំងដោយក្រុងមូស្គូ បាននិយាយថា កងនាវាសមុទ្រខ្មៅរបស់រុស្ស៉ីបានវាយលុកឆ្លើយតប លើការវាយប្រហារដោយយន្តហោះដ្រូន លើទីក្រុងកំពង់ផែស៉ីវ៉ាស្តូប៉ូល (Sevastopol) នៃតំបន់គ្រីមៀ នៅព្រឹកថ្ងៃចន្ទនេះ (ម៉ោងក្នុងតំបន់)។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី២៤ ខែមេសា ឆ្នាំ២០២៣។

អភិបាលក្រុងស៉ីវ៉ាស្តូប៉ូល លោក មីកាអែល រ៉ាស់វ៉ូហ្សេវ (Mikhail Razvozhaev) បានឲ្យដឹងតាមបណ្តាញតេឡេក្រាមយ៉ាងដូច្នេះថា «យោងតាមព័ត៌មានចុងក្រោយបង្អស់ ដ្រូនហោះនៅលើផ្ទៃអាកាសមួយគ្រឿងត្រូវបំផ្លាញ ខណៈដ្រូនទី២ ផ្ទុះដោយខ្លួនឯង។ ពេលនេះស្ថានភាពក្នុងទីក្រុងមានភាពស្ងប់​ស្ងាត់​ហើយ»។ លោក រ៉ាស់វ៉ូហ្សេវ បានបន្ថែមថា «គ្មានការបំផ្លិចបំផ្លាញណាមួយ ត្រូវបានរកឃើញនោះទេ»។

ទីភ្នាក់ងារព័ត៌មាន Interfax របស់រុស្ស៉ី ក៏បានរាយការណ៍ដោយដកស្រង់សំដីរបស់អាជ្ញាធរដឹកជញ្ជូនរបស់ទីក្រុងស៉ីវ៉ាស្តូប៉ូល ឲ្យដឹងថា មិនមានហេតុផលណាមួយត្រូវបានផ្តល់ឲ្យនោះទេ ប៉ុន្តែមានការផ្អាកចរាចរណ៍ដោយសារតែការវាយប្រហារពីយន្តហោះដ្រូន។

គួរបញ្ជាក់ថា Sevastopol រួមជាមួយតំបន់ដទៃទៀតនៃឧបទ្វីបគ្រីមៀ ត្រូវបានប្រកាសថាជាឧបសម្ព័ន្ធដោយរុស្ស៊ីក្នុងឆ្នាំ២០១៤ ប៉ុន្តែនៅតែទទួលស្គាល់ជាអន្តរជាតិថា ជាផ្នែកមួយនៃទឹកដីអ៊ុយក្រែន។ ភ្លាមៗនេះ អ៊ុយក្រែននៅមិនទាន់មានប្រតិកម្មឆ្លើយតបនោះទេ ជុំវិញសេចក្តីរាយការណ៍នេះ៕