(កូប៉ិកហាក)៖ នៅថ្ងៃព្រហស្បតិ៍នេះ ដាណឺម៉ាកបានប្រកាសថា ខ្លួននិងហូឡង់បានព្រមព្រៀងគ្នាទិញរថក្រោះ Leopard 2 ១៤គ្រឿង ហើយបរិច្ចាគពួកវាទៅឱ្យអ៊ុយក្រែន ដើម្បីប្រើក្នុងកិច្ចប្រឹងប្រែងតស៊ូប្រឆាំងការឈ្លានពានរបស់រុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២០ ខែមេសា ឆ្នាំ២០២៣។

ក្រសួងការពារជាតិដាណឺម៉ាបានលើកឡើង ក្នុងសេចក្តីថ្លែងការណ៍យ៉ាងដូច្នេះថា «ថ្ងៃនេះហូឡង់និងដាណឺម៉ាសូមប្រកាស នូវចេតនារបស់​ពួកយើងក្នុងការរួមគ្នាទិញ កែលម្អ ហើយបរិច្ចាគនូវ រថក្រោះ Leopard 2A4 សរុបចំនួន១៤គ្រឿង សម្រាប់អ៊ុយក្រែន»។ យោងតាម​សេចក្តីថ្លែងការណ៍ដដែល រថក្រោះទាំងនោះ នឹងត្រូវចាប់ផ្តើមប្រគល់ឱ្យ ទីក្រុងកៀវ នៅខ្ទង់ដើមឆ្នាំ២០២៤ ខណៈថវិកាត្រូវចំណាយ គឺប្រហែល១៦៥លានអឺរ៉ូ (១៨០លានដុល្លារអាមេរិក) ដែលនឹងត្រូវបែងចែកចំណែកស្មើគ្នារវាងប្រទេសទាំងពីរ។

គួរបញ្ជាក់ថា ប្រភេទរថក្រោះខាងលើ ស្ថិតក្នុងបញ្ជីសព្វាវុធធុនធ្ងន់ ដែលអ៊ុយក្រែនចង់បានជាយូរមកហើយ។ កាលពីខែមីនាកន្លងទៅនេះ អាល្លឺម៉ង់បានបញ្ជូនរថក្រោះ Leopard 2 ១៨គ្រឿង ខណៈចក្រភពអង់គ្លេសបានបញ្ជូនរថក្រោះ Challenger 2 របស់ខ្លួន១៤គ្រឿង ដល់ដែអ៊ុយក្រែន៕