(វ៉ាស៉ីនតោន)៖ យោងតាមកាសែតអាមេរិក Washington Post ឯកសារព័ត៌មានសម្ងាត់របស់យោធាអាមេរិក ដែលបែកធ្លាយបាននិយាយថា យោធាចិនប្រហែលអាចនឹងចាប់ផ្តើមប្រើប្រាស់ យន្តហោះដ្រូនឈ្លបការណ៍ប្រភេទថ្មី ដែលធ្វើប្រតិបត្តិការនៅរយៈកម្ពស់ខ្ពស់ ហើយអាចធ្វើដំណើរក្នុងល្បឿន លឿនជាងល្បឿនសំឡេងយ៉ាងហោច៣ដង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៩ ខែមេសា ឆ្នាំ២០២៣។
កាសែត Washington Post បានរាយការណ៍ដូចខាងលើ ដោយផ្អែកលើឯកសារសម្ងាត់ របស់ទីភ្នាក់ងារប្រមូលព័ត៌មានសម្ងាត់ NGA នៃក្រសួងការពារជាតិអាមេរិក។ ក្នុងឯកសារនោះរួមមាននូវរូបភាពពីផ្កាយរណប ចុះកាលបរិច្ឆេទថ្ងៃទី៩ ខែសីហា ដែលបង្ហាញឱ្យឃើញ ដ្រូនឈ្លបការណ៍ដែលដំណើរការដោយម៉ាស៉ីនរ៉ុក្កែត ហៅថា WZ-8 ចំនួន២គ្រឿង ស្ថិតក្នុងមូលដ្ឋានទ័ពអាកាសមួយកន្លែង នៅភាគខាងកើតប្រទេសចិន។ ការវាយតម្លៃរបស់អាមេរិកបាននិយាយថា យោធាចិនទំនងជាបានបង្កើត អង្គភាពដ្រូនដំបូងរបស់ខ្លួននៅមូលដ្ឋាននោះ ហើយអាចនឹងចាប់ផ្តើមប្រើប្រាស់ពួកវា ក្នុងពេលឆាប់ៗខាងមុខ។
គួរបញ្ជាក់ថា យន្តហោះដ្រូន WZ-8 ត្រូវបានបង្ហាញរូបរាងជាសាធារណៈជាលើកដំបូង កំលុងព្យុហយាត្រាអបអរខួបទី៧០ នៃថ្ងៃកំណើតរបស់សាធារណរដ្ឋប្រជាមានិតចិន កាលពីថ្ងៃទី១ ខែតុលា ឆ្នាំ២០១៩ ហើយក្រោយមកក៏ត្រូវបានតាំងបង្ហាញ កំលុងព្រឹត្តិការណ៍ពិព័រណ៍ផ្លូវអាកាស ជូហៃ (Zhuhai) កាលពីឆ្នាំ២០២១។ ព័ត៌មានមួយចំនួន ដែលគេដឹងអំពីវា គឺយន្តហោះដ្រូនចិនស៊េរីថ្មីនេះ ធ្វើប្រតិបត្តិការនៅរយៈកម្ពស់ខ្ពស់ខ្ទង់រាប់ម៉ឺនម៉ែត្រ ហើយអាចហោះក្នុងល្បឿនលឿនជាងសំឡេងយ៉ាងហោចណាស់៣ដង ដែលជាកម្រិតហៅថា ស៊ូភើសូនិច ប៉ុន្តែល្បឿនរបស់វាក៏ត្រូវគេជឿថា អាចលឿនជាងសំឡេងដល់៦-៧ដង ដែលចូលដល់កម្រិតហៅថា ហៃភើសូនិច ផងដែរ។ យន្តហោះដ្រូន WZ-8 ត្រូវនាំយកឡើងទៅលើផ្ទៃអាកាស តាមរយៈយន្តហោះមេ ដូចជាយន្តហោះទម្លាក់គ្រាប់បែក H-6K ជាដើម ហើយបន្ទាប់មកទើបផ្តាច់ខ្លួន នៅរយៈកម្ពស់សមស្របមួយ ដើម្បីធ្វើប្រតិបត្តិការដាច់ដោយឡែក ដោយប្រើម៉ាស៉ីនរ៉ុក្កែតរបស់វា៕