(ដាម៉ាស)៖ រដ្ឋមន្ត្រីការបរទេសអារ៉ាប៊ីសាអូឌីត ព្រះអង្គម្ចាស់ Faisal bin Farhan Al Saud បានមកដល់រដ្ឋធានីដាម៉ាស ប្រទេសស៊ីរី កាលពីរសៀលថ្ងៃអង្គារ ដែលជាដំណើរទស្សនកិច្ចលើកដំបូងរបស់មន្ត្រីអារ៉ាប៊ីសាអូឌីតទៅកាន់ប្រទេសស៊ីរីក្នុងរយៈពេល ១២ឆ្នាំ។ នេះបើយោងតាមទីភ្នាក់ងារសារព័ត៌មានរដ្ឋ SANA នៅថ្ងៃអង្គារ ទី១៨ ខែមេសា ឆ្នាំ២០២៣។

ដំណើរ​ទស្សនកិច្ច​នេះ​ធ្វើ​ឡើង​ប៉ុន្មាន​ថ្ងៃ​ បន្ទាប់​ពី​រដ្ឋមន្ត្រី​ការបរទេស​ស៊ីរី​ លោក Faisal Mekdad បាន​ធ្វើ​ទស្សនកិច្ច​នៅអារ៉ាប៊ីសាអូឌីត ដែលជា​ផ្នែក​មួយ​នៃ​កិច្ច​ប្រឹងប្រែង​ដើម្បី​ស្តារ​ទំនាក់ទំនង​ធម្មតា​រវាង​ប្រទេស​ទាំង​ពីរ។

ក្នុងអំឡុងពេលទស្សនកិច្ចរបស់ លោក Mekdad កិច្ចព្រមព្រៀងមួយត្រូវបានធ្វើឡើងដើម្បីស្ដារសេវាកម្មស្ថានកុងស៊ុល និងបន្តការហោះហើរតាមផ្លូវអាកាសរវាងប្រទេសទាំងពីរ។

កាលពីសប្តាហ៍មុន អ្នកការទូតមកពីប្រទេសអារ៉ាប់ចំនួនប្រាំបួន បានជួបប្រជុំគ្នានៅទីក្រុង Jeddah ប្រទេសអារ៉ាប៊ីសាអូឌីត ដើម្បីពិភាក្សាអំពីការវិលត្រលប់របស់ស៊ីរីទៅកាន់សម្ព័ន្ធអារ៉ាប់ ដោយនិយាយថា ដំណោះស្រាយនយោបាយគឺជាមធ្យោបាយតែមួយគត់ដើម្បីបញ្ចប់វិបត្តិស៊ីរី៕