(តូក្យូ)៖ រដ្ឋមន្រ្តីការបរទេសអាមេរិក លោក អាន់តូនី ប៊្លីនខិន (Anthony Blinken) នៅថ្ងៃអង្គារនេះ បាននិយាយថា សហរដ្ឋអាមេរិក​អាចបោះជំហានឆ្ពោះទៅមុខបាន សម្រាប់ទំនាក់ទំនងរបស់ខ្លួនជាមួយចិន ក្រោយជំនួបរវាងប្រធានាធិបតីអាមេរិក លោក ចូ បៃដិន និង​ប្រធានាធិបតីចិន លោក ស៉ី ជិនពីង កាលពីឆ្នាំមុន ប៉ុន្តែវាតម្រូវឱ្យ ទីក្រុងប៉េកាំងបង្ហាញចេញឱ្យច្បាស់នូវចេតនារបស់ខ្លួន។ នេះបើតាមការ​ចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៨ ខែមេសា ឆ្នាំ២០២៣។

លោកប្រមុខការទូតអាមេរិក បានធ្វើការអត្ថាធិប្បាយដូចខាងលើ កំលុងសន្និសីទសារព័ត៌មានមួយ ក្នុងថ្ងៃបិទបញ្ចប់នៃកិច្ចប្រជុំក្រុមប្រទេស G7 នៅឯទីក្រុងការូអ៉ិហ្សាវ៉ា (Karuizawa) ប្រទេសជប៉ុន។ លោក ចូ បៃដិន បានជួបលោក ស៉ី ជិនពីង នៅប្រទេសឥណ្ឌូណេស៉ី កាលពីខែវិច្ឆិកា ឆ្នាំមុន សម្រាប់កិច្ចប្រជុំមួយមានរយៈពេល៣ម៉ោង ដែលសំដៅទប់ស្កាត់កុំឱ្យភាពដុនដាប នៃទំនាក់ទំនងរវាងប្រទេសមហាអំណាចទាំងពីរ ប្រែក្លាយទៅ​ជាសង្រ្គាមត្រជាក់ថ្មីមួយទៀត។

ដោយឡែក នៅថ្ងៃអង្គារដដែលនេះ អ្នកនាំពាក្យក្រសួងការបរទេសចិន លោក វ៉ាង វិនពិន (Wang Wenbin) បានលើកឡើងដូច្នេះថា «សហរដ្ឋអាមេរិកបានបង្កើតនិងអនុវត្ត គោលនយោបាយដែលមិនត្រឹមត្រូវនោះឡើយសំដៅមករកចិន ដោយផ្អែកទៅលើការយល់ខុសសុទ្ធសាធអំពី​ប្រទេសចិន» ហើយលោក វ៉ាង បានទម្លាក់កំហុសទៅលើរឿងនេះ សម្រាប់ភាពតានតឹងបច្ចុប្បន្ននៃចំណងទាក់ទងទ្វេភាគីចិន-អាមេរិក៕