(សេអ៊ូល)៖ ប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាង នៅថ្ងៃអង្គារនេះបានរាយការណ៍ថា ប្រធានាធិបតីចិន លោក ស៉ី ជិនពីង បានផ្ញើលិខិតមួយច្បាប់ទៅកាន់ ប្រមុខដឹកនាំកំពូលកូរ៉េខាងជើង លោក គីម ជុងអ៊ុន ដោយបានបង្ហាញនូវឆន្ទៈរបស់លោក ដើម្បី​បន្តពង្រឹងទំនាក់ទំនងយុទ្ធសាស្រ្តឱ្យកាន់តែរឹងមាំថែមទៀត ជាមួយប្រទេសកូរ៉េខាងជើង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៨ ខែមេសា ឆ្នាំ២០២៣។

យោងតាមទីភ្នាក់ងារព័ត៌មានកូរ៉េខាងជើង KCNA លោកប្រធានាធិបតីចិន បានសម្តែងការអរគុណយ៉ាងជ្រាលជ្រៅចំពោះលោក គីម ជុងអ៊ុន ក្នុងលិខិតមួយផ្ញើកាលពីថ្ងៃទី១២ ខែមេសា ដែលជាការឆ្លើយតបចំពោះ សារលិខិតកាលពីខែមុនរបស់លោក គីម ដែលត្រូវ​បានផ្ញើទៅកាន់ភាគីចិន ដើម្បីអបអរ​សាទរ​លោក ស៉ី ជិនពីង ក្នុងឱកាសបន្តជាប់ឆ្នោតជា ប្រធានធិបតីចិនសម្រាប់អាណត្តិទី៣។ នៅក្នុងនោះ លោក ស៉ី បាននិយាយថា ចិននិងកូរ៉េខាងជើង បានបន្តរក្សាក៏ដូចជាអភិវឌ្ឍនូវទំនាក់ទំនងមិត្តភាពដ៏យូរអង្វែងរបស់ខ្លួន ទោះបីជាស្ថានការណ៍​សន្តិសុខអន្តរជាតិនិងក្នុងតំបន់ មានការប្រែប្រួលនិងស្មុគស្មាញខ្លាំងយ៉ាងណាក៏ដោយ។

បើតាម KCNA លោក ស៉ី ជិនពីង ក៏បានបង្ហាញឆន្ទៈក្នុងការលើកកម្ពស់ចំណងទ្វេភាគី ឱ្យកាន់តែខ្ពស់មួយកម្រិតទៀតផងដែរ តាមរយៈ​ការពង្រឹងការធ្វើប្រាស្រ័យទាក់ទង លក្ខណៈយុទ្ធសាស្រ្តរវាងគ្នានិងគ្នា ហើយរួមគ្នាដឹកនាំការអភិវឌ្ឍនៃទំនាក់ទំនងរវាងទីក្រុងប៉េកាំងនិង​ទីក្រុងព្យុងយ៉ាង ជាមួយលោក គីម ជុងអ៊ុន។ លោក គីម បានផ្ញើលិខិតមួយច្បាប់ ដើម្បីបង្ហាញការអបអរដល់លោក ស៉ី កាលពីថ្ងៃទី១០ ខែមីនា ជាថ្ងៃដែលលោក ស៉ី ជាប់ឆ្នោតអាណត្តិទី៣ ក្នុងនាមជាប្រធានាធិបតីចិន ដែលមិនធ្លាប់មានឡើយ។

គួរបញ្ជាក់ថា កូរ៉េខាងជើងបាននិងកំពុងខំប្រឹងពង្រឹងទំនាក់ទំនងរបស់ខ្លួនជាមួយចិន ដែលជាសម្ព័ន្ធមិត្តនិងជាខ្នងបង្អែកផ្នែកសេដ្ឋកិច្ច តាំងតែពីដើមមករបស់ទីក្រុងព្យុងយ៉ាង នៅចំពោះមុខការដាក់ទណ្ឌកម្មរបស់អន្តរជាតិ ជុំវិញកម្មវិធីមីស៉ីលនិងអាវុធនុយក្លេអ៊ែររបស់​ប្រទេសឯកោមួយនេះ បូករួមជាមួយការកើនឡើងនៃភាពតឹងជាមួយកូរ៉េខាងត្បូង និងសហរដ្ឋអាមេរិក៕