(វ៉ារស្សាវ)៖ មេដឹកនាំគណបក្សច្បាប់ និងយុត្តិធម៌ (PiS) ដែលកំពុងកាន់អំណាច លោក Jaroslaw Kaczynski បាននិយាយកាលពីថ្ងៃសៅរ៍ថា រដ្ឋាភិបាលប៉ូឡូញបានសម្រេចចិត្តហាមឃាត់ការនាំចូលគ្រាប់ធញ្ញជាតិ និងអាហារផ្សេងទៀតពីអ៊ុយក្រែន ដើម្បីការពារវិស័យកសិកម្មរបស់ប្រទេសប៉ូឡូញ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃសៅរ៍ ទី១៥ ខែមេសា​ ឆ្នាំ២០២៣។

បរិមាណដ៏ច្រើននៃគ្រាប់ធញ្ញជាតិអ៊ុយក្រែន ដែលកំពុងរាំងស្ទះនៅក្នុងបណ្តាប្រទេសអឺរ៉ុបកណ្តាល ចំពេលមានបញ្ហាផ្នែកដឹកជញ្ជូន ដែលមានតម្លៃថោកជាងផលិតផលដែលផលិតនៅក្នុងសហភាពអឺរ៉ុប ធ្វើឱ្យប៉ះពាល់ដល់តម្លៃ និងការលក់ដល់កសិករក្នុងស្រុក។

នេះវា​បាន​បង្កើត​ជាបញ្ហា​នយោបាយ ​សម្រាប់​គណបក្ស​ច្បាប់​និង​យុត្តិធម៌​ក្នុង​ឆ្នាំ​បោះឆ្នោត។ លោក Kaczynski បាននិយាយក្នុងអំឡុងសមាជបក្ស (PiS) ថា «ថ្ងៃនេះ រដ្ឋាភិបាលបានសម្រេចចិត្តលើបទប្បញ្ញត្តិហាមឃាត់ការចូល និងការនាំចូលគ្រាប់ធញ្ញជាតិទៅកាន់ប្រទេសប៉ូឡូញ ហើយមានប្រភេទអាហាររាប់សិបប្រភេទផ្សេងទៀត (ពីអ៊ុយក្រែន) ផងដែរ»។

លោក​បាន​បន្ថែម​ថា បញ្ជី​ទំនិញ​ទាំង​នេះ​នឹង​ត្រូវ​ដាក់​បញ្ចូល​ក្នុង​បទប្បញ្ញត្តិ​របស់​រដ្ឋាភិបាល ហើយ​មាន​ទំនិញ «ពី​គ្រាប់​ធញ្ញជាតិ រហូត​ដល់​ផលិតផល​ទឹកឃ្មុំ មាន​របស់​ជាច្រើនយ៉ាង»។

ទោះយ៉ាងណាលោកបានសង្កត់ធ្ងន់ថា «យើងជាមិត្ត និងជាសម្ព័ន្ធមិត្តរបស់អ៊ុយក្រែន។ យើងនឹងនៅបន្តគាំទ្រវាជានិច្ច... ប៉ុន្តែដើម្បីការពារផលប្រយោជន៍របស់ពលរដ្ឋរបស់ខ្លួន វាជាកាតព្វកិច្ចរបស់រដ្ឋនីមួយៗ»។

លោក Kaczynski បាននិយាយទៀតថា ប្រទេសប៉ូឡូញត្រៀមខ្លួនជាស្រេចដើម្បីចាប់ផ្តើមកិច្ចពិភាក្សាជាមួយអ៊ុយក្រែន ដើម្បីដោះស្រាយបញ្ហាគ្រាប់ធញ្ញជាតិ ហើយភាគីអ៊ុយក្រែនត្រូវបានជូនដំណឹងរួចហើយអំពីការសម្រេចចិត្តរបស់រដ្ឋាភិបាលប៉ូឡូញនេះ៕