(ប៉េកាំង)៖ ចិនបានបន្តចល័តនាវាចម្បាំងនិងយន្តហោះយោធាទៅក្បែរតៃវ៉ាន់ សម្រាប់រយៈពេល២ថ្ងៃជាប់ៗគ្នា ចំពោះមុខការខឹងសម្បារ​ជុំវិញជំនួបក្នុងសប្តាហ៍នេះ រវាងមេដឹកនាំកោះតៃវ៉ាន់ លោកស្រី សៃ អ៉ីងវិន (Tsai Ing Wen) ហើយនិងប្រធានសភាតំណាងរាស្រ្តអាមេរិក លោក ខេវិន ម៉ាក់ខាធី (Kevin McCarthy) នៅរដ្ឋកាលីហ្វរញ៉ា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៧ ខែមេសា ឆ្នាំ២០២៣។

ក្រសួងការពារជាតិតៃវ៉ាន់ បានអះអាងនៅថ្ងៃសុក្រនេះថា នាវាចម្បាំងចិន៣គ្រឿងបានធ្វើនាវាចរណ៍ មកក្នុងដែនទឹកនៅក្បែរកោះតៃវ៉ាន់ ខណៈយន្តហោះចម្បាំង១គ្រឿង និងឧទ្ធម្ភាគចក្រប្រឆាំងានាវាមុជទឹក១គ្រឿង ក៏បានធ្វើដំណើរឆ្លងចូលមកក្នុង តំបន់កំណត់អត្តសញ្ញាណ​ការពារដែនអាកាស ADIZ របស់តៃវ៉ាន់ផងដែរ។ កាលពីថ្ងៃពុធ នាវាផ្ទុកយន្តហោះចម្បាំងចិន សានទុង (Shandong) ត្រូវបានប្រទះ​ឃើញធ្វើដំណើរឆ្លងកាត់ ដែនទឹកភាគអាគ្នេយ៍នៃកោះតៃវ៉ាន់ ឆ្ពោះទៅកាន់មហាសមុទ្រប៉ាស៉ីហ្វិក ដែលវាបានកើតឡើងតែប៉ុន្មានម៉ោងប៉ុណ្ណោះ មុនពេលលោកស្រី សៃ ជួបលោក ម៉ាក់ខាធី នៅទីក្រុងឡូសអាន់ជេឡែស។

គួរបញ្ជាក់ថា រីឯកាលពីថ្ងៃព្រហស្បតិ៍វិញ ក្រសួងការពារជាតិតៃវ៉ាន់ បានអះអាងថា យោធាចិនបានបញ្ជូនឧទ្ធម្ភាគចក្រប្រឆាំងនាវាមុជទឹក ១គ្រឿង និងនាវាចម្បាំង៣គ្រឿង មកជុំវិញដែនកោះនេះ។ មុនជំនួបរវាងលោកស្រី សៃ និងលោក ម៉ាក់ខាធី ទីក្រុងប៉េកាំង ដែលចាត់ទុក​កោះតៃវ៉ាន់ជាផ្នែកមិនអាចកាត់ផ្តាច់បាន នៃទឹកដីរបស់ប្រទេសចិន បានចេញសារ​ព្រមានម្តងហើយម្តងទៀត កុំឱ្យរឿងនោះកើតឡើង៕