(វ៉ាស៉ីនតោន)៖ មេដឹកនាំតៃវ៉ាន់ លោកស្រី សៃ អ៉ីងវិន (Tsai Ing-wen) បានកោះប្រជុំពិភាក្សាជាមួយក្រុមមន្រ្តីជាន់ខ្ពស់សន្តិសុខជាតិរបស់ខ្លួន កាលពីថ្ងៃអង្គារសប្តាហ៍នេះ ដើម្បីពិភាក្សាអំពី «ស្ថានភាពក្នុងតំបន់» មុនពេលដែលលោកស្រី នឹងត្រូវជួបប្រធានសភាតំណាងរាស្រ្ត លោក ខេវីន​ ម៉ាកខេធី (Kevin McCarthy) នៅរដ្ឋកាលីហ្វ័រញ៉ា របស់សហរដ្ឋអាមេរិក។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី៥​ ខែមេសា ឆ្នាំ២០២៣។

ការិយាល័យមេដឹកនាំតៃវ៉ាន់ បានឲ្យដឹងថា លោកស្រី សៃ កោះប្រជុំអនឡាញចេញពីប្រទេសបេលី ដែលជាកន្លែងចុងបញ្ចប់នៃដំណើររបស់លោកស្រី នៅតំបន់អាមេរិកកណ្តាល មុនពេលទៅកាន់ទីក្រុងឡូស អាន់ជីឡេស (Los Angeles)។ ក្រោយពីបានស្តាប់របាយការណ៍សង្ខេបអំពីស្ថានភាពក្នុងតំបន់ទាំងមូល លោកស្រី សៃ បានស្នើដល់គ្រប់អង្គភាពពាក់ព័ន្ធបន្តតាមដានស្ថានភាពនៅជុំវិញ និងដើម្បីឲ្យគណៈប្រតិភូដែលកំពុងបំពេញទស្សនកិច្ចនៅខាងក្រៅ បានដឹងអំពីស្ថានភាពក្នុងពេលវេលាជាក់ស្តែង។ លោកស្រី សៃ ត្រូវទៅដល់ទីក្រុង Los Angeles នៅល្ងាចថ្ងៃអង្គារ (ម៉ោងនៅអាមេរិក) ហើយគ្រោងនឹងត្រឡប់ទៅទីក្រុងតៃប៉ិវិញ នៅថ្ងៃសុក្រសប្តាហ៍នេះ។

គួរបញ្ជាក់ថា កន្លងមកប្រទេសចិន ធ្លាប់បានគំរាមចាត់វិធានការដែលមិនបញ្ជាក់ច្បាស់លាស់ ប្រសិនលោកស្រី សៃ និងលោក ម៉ាកខេធី ជួបគ្នាតាមការគ្រោងទុកមែននោះ។ នៅថ្ងៃពុធនេះ ប្រព័ន្ធផ្សព្វផ្សាយរដ្ឋរបស់ចិនបានរាយការណ៍ថា នាវាដែលដំណើរការដោយរដ្ឋបាលសុវត្ថិភាពដែនសមុទ្រនៃខេត្តហ្វូជាំង (Fujian) ដែលនៅទល់មុខនឹងកោះតៃវ៉ាន់ កំពុងដឹកនាំការល្បាតនៅតំបន់ភាគកណ្តាល និងភាគខាងជើងនៃច្រកសមុទ្រតៃវ៉ាន់ តែមិនផ្តល់ព័ត៌មានលម្អិតបន្ថែមឡើយ៕