(ឡុងដ៏)៖ សហជីពគ្រូបង្រៀននៅអង់គ្លេសបាននិយាយនៅថ្ងៃចន្ទនេះថា ក្រុមគ្រូបង្រៀនបានច្រានចោលយ៉ាងលើសលប់ នូវលក្ខខណ្ឌផ្តល់ប្រាក់ឈ្នួលពីសំណាក់រដ្ឋាភិបាល ក្នុងបំណងបញ្ចប់កូដកម្មដែលបង្កការរំខានជាបន្តបន្ទាប់ ហើយពួកគេថានឹងបន្តផ្អាកការងារចំនួនពីរថ្ងៃទៀត។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី៣ ខែមេសា ឆ្នាំ២០២៣។

សហជីពវិស័យអប់រំជាតិ ដែលជាសហជីពដ៏ធំបំផុតរបស់ចក្រភពអង់គ្លេស បានឲ្យដឹងថា ៩៨ភាគរយនៃគ្រូបង្រៀនបានបដិសេធលើ ការផ្តល់ឲ្យពួកគេនូវផ្តល់ថវិកាឧបត្ថម្ភចំនួន ១,០០០ផោន ឬជាង ១,២០០ដុល្លារ ក្នុងឆ្នាំ២០២៣នេះ និងការដំឡើងប្រាក់បៀរវត្សរ៍ជាមធ្យម ៤.៥ភាគរយ នៅឆ្នាំបន្ទាប់។

សហជីពបាននិយាយ​ថា គ្រូបង្រៀន​នឹង​ធ្វើ​កូដកម្ម​ពីរ​ថ្ងៃ​ទៀត គឺ​នៅ​ថ្ងៃ​ទី២៧ ខែ​មេសា និង​ថ្ងៃ​ទី២ ខែ​ឧសភា ខណៈរដ្ឋាភិបាល​អះអាងថា ការ​ដំឡើង​ប្រាក់​ខែ​ខ្ពស់​ នឹង​ធ្វើ​ឲ្យកម្រិតអតិផរណា​កាន់​តែ​អាក្រក់ទៅ។

គួរបញ្ជា់ថា គ្រូបង្រៀនរាប់ម៉ឺននាក់នៅទូទាំងចក្រភពអង់គ្លេស បានចាត់វិធានការដោយធ្វើកូដកម្មផ្អាកការបង្រៀន នៅឆ្នាំ២០២៣នេះ ដើម្បីទាមទារដំឡើងប្រាក់ខែឱ្យខ្ពស់ជាងកម្រិតអតិផរណា ដែលនាំគ្នាទុកថ្នាក់រៀនជាច្រើនឱ្យនៅទំនេរចោល ហើយដាក់សម្ពាធលើនាយករដ្ឋមន្ត្រី លោក រីស៉ី ស៊ូណាក់ (Rishi Sunak) ឲ្យដោះស្រាយបញ្ហានេះ៕