(មូស្គូ)៖ រុស្ស៉ីកំពុងមានផែនការបង្កើតកងពលតូចមួយ នៃក្រុមនាវាមុជទឹកពិសេស ដែលនឹងត្រូវផ្ទុកពពួកមីស៉ីលថូភីដូបាញ់ក្រោមផ្ទៃទឹក ហៅថា ផូសាយដុន (Poseidon) ដែលអាចបំពាក់ក្បាលគ្រាប់នុយក្លេអ៊ែរ នៅមុនដំណាច់ឆ្នាំ២០២៤ ឬកំលុង៦ខែដំបូងនៃឆ្នាំ២០២៥។ នេះបើតាមការចេញផ្សាយដោយ ទីភ្នាក់ងារព័ត៌មាន TASS នៅថ្ងៃចន្ទ ទី៣ ខែមេសា ឆ្នាំ២០២៣។

កាលពីខែមករាកន្លងទៅ រុស្ស៉ីបានប្រកាសថា ខ្លួនផលិតបានមីស៉ីលថូភីដូ Poseidon មួយឈុតដំបូងហើយ ពោលគឺរយៈពេល៤ឆ្នាំ បន្ទាប់ពីប្រធានាធិបតីរុស្ស៉ី លោក វ៉្លាឌីមៀ ពូទីន បានប្រកាសអំពីអាវុធនុយក្លេអ៊ែរស្រ្តាធីជីគ ឬអាវុធនុយក្លេអ៊ែរយុទ្ធសាស្រ្ត ដែលមានមូលដ្ឋានគ្រឹះ​ប្រភេទថ្មីសន្លាងមួយនេះ។

ដោយផ្អែកលើប្រភពពីវិស័យការពារជាតិដែលខ្លួនទទួលបាន ទីភ្នាក់ងារព័ត៌មាន TASS បានរាយការណ៍យ៉ាងដូច្នេះថា «ការសម្រេចចិត្តដើម្បីបង្កើតកងពលតូច នៃក្រុមនាវាមុជទឹកនុយក្លេអ៊ែរពិសេស នៅឧបទ្វីបកាំឆាត់កា (Kamchatka) គឺត្រូវបានធ្វើឡើងហើយ។ វាអាច​នឹងសម្រេចបាននៅកំលុងខែធ្នូ ឆ្នាំ២០២៤ ឬក៏កំលុង៦ខែដំបូងនៃឆ្នាំ២០២៥»។

គួរបញ្ជាក់ថា បើតាមការអះអាងរបស់រុស្ស៉ីកាលពីចុងខែមីនា ហេដ្ឋារចនាសម្ព័ន្ធនៅជាប់ឆ្នេរសមុទ្រ សម្រាប់ក្រុមនាវាមុជទឹកដែលនឹងត្រូវ​ផ្ទុកមីស៉ីល Poseidon នឹងសាងសង់រួចរាល់ជាស្ថាពរនៅឯឧបទ្វីបកាំឆាត់កា ជាទីដែលក្រុមនាវាមុជទឹកផ្ទុកមីស៉ីលបាលិស្ទីគនុយក្លេអ៊ែរ ​របស់យោធាជើងទឹករុស្ស៉ីប្រចាំតំបន់ប៉ាស៉ីហ្វិកឈរជើង។ យោងតាមក្រុមអ្នកវិភាគយោធា មីស៉ីល Poseidon ទំនងជាអាវុធកូនកាត់រវាង​មីស៉ីលថូភីដូរត់ក្រោមទឹកហើយនិងដ្រូន ដែលអាចបាញ់ចេញពីនាវាមុជទឹក ហើយបំពាក់ក្បាលគ្រាប់នុយក្លេអ៊ែរ៕