(ហែលស៉ិនគី)៖ គណបក្សអភិរក្សនិយមធំបំផុតរបស់ប្រទេសហ្វាំងឡង់ បានប្រកាសជ័យជម្នះ ក្នុងការបោះឆ្នោតជ្រើសរើសសមាជិកសភា ដែលមានការប្រកួតប្រជែងយ៉ាងស្វិតស្វាញ ខណៈនាយករដ្ឋមន្រ្តីហ្វាំងឡង់គឺលោកស្រី សានណា ម៉ារីន (Sanna Marin) បានទទួល​ស្គាល់ភាពបរាជ័យ នៃគណបក្សលោកស្រី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី៣ ខែមេសា ឆ្នាំ២០២៣។

ក្រោយសន្លឹកឆ្នោតត្រូវបានរាប់ចប់រួចរាល់កាលពីថ្ងៃអាទិត្យ គណបក្សអភិរក្សនិយម NCP ដែលជាបក្សប្រឆាំង ទទួលបានសំឡេងគាំទ្រ​នៅលើគេគឺ២០.៨ភាគរយ។ រីឯឈរនៅលំដាប់ទី២ គឺគណបក្សប្រជានិយម The Finns ជាមួយសំឡេង២០.១ភាគរយ ហើយគណបក្ស Social Democracts របស់លោកស្រី Marin ស្ថិតនៅលេខ៣ ដោយទទួលបានការគាំទ្រ១៩.៩ភាគរយ។

ដោយគណបក្សនាំមុខទាំង៣ សុទ្ធតែទទួលបានសំឡេងគាំទ្រក្បែរៗ ២០ភាគរយដូចគ្នាបែបនេះ គឺពុំមានបក្សមួយណាស្ថិតក្នុងជំហរ ដែលអាចបង្កើតរដ្ឋាភិបាលតែម្នាក់ឯងឡើយ។ យ៉ាងណាក្តី មេដឹកនាំគណបក្ស NCP លោក ប៉េតតឺរី អ័រប៉ូ (Petteri Orpo) បាន​អះអាងថា បក្សលោកទទួលបានសិទ្ធិធំជាងគេ ដូច្នេះហើយកិច្ចចរចាដើម្បីបង្កើតរដ្ឋាភិបាលថ្មី នឹងត្រូវផ្តួចផ្តើមឡើងក្រោម​ការដឹកនាំរបស់គណបក្ស NCP។ ចំណែកលោកស្រី សានណា ម៉ារីន ដែលមានអាយុ៣៧ឆ្នាំ និងជាមេដឹកនាំដ៏ក្មេងបំផុតម្នាក់របស់អឺរ៉ុប ក៏បានអបអរសាទរដល់​គណបក្ស NCP និងគណបក្ស The Finns ផងដែរ។

គួរបញ្ជាក់ថា លោកស្រី ម៉ារីន បានក្លាយជានាយករដ្ឋមន្រ្តីហ្វាំឡង់ កាលពីឆ្នាំ២០១៩ ដែលនៅពេលនោះ លោកស្រីជាប់ឈ្នោះ ជានាយករដ្ឋមន្រ្តីក្មេងជាងគេបំផុតលើលោក។ លោកស្រីទទួលបានការកើតសរសើរពីអន្តរជាតិ សម្រាប់កិច្ចប្រឹងប្រែងគាំទ្រយ៉ាងស្វាហាប់របស់លោកស្រីចំពោះអ៊ុយក្រែន ដែលស្ថិតក្នុងសង្រ្គាមជាមួយរុស្ស៉ី រួមទាំងតួនាទីដ៏សំខាន់របស់លោកស្រី រួមជាមួយប្រធានាធិបតីហ្វាំងឡង់ លោក សាវលី នីនីស្តូ (Sauli Niinisto) សម្រាប់ភាពខ្នះខ្នែងជំរុញពាក្យស្នើសុំសមាជិកភាពអង្គការណាតូ (NATO) របស់ហ្វាំងឡង់ ឱ្យសម្រេចបានជោគជ័យ៕