(ម៉ានីល)៖ កាលពីថ្ងៃសុក្រសប្តាហ៍នេះ ពលទាហានហ្វីលីពីនបានហ្វឹកហ្វឺនបាញ់គ្រាប់ពិត ជាមួយសមភាគីអាមេរិករបស់ពួកគេ នៅក្នុងជំរំយោធា​ធំបំផុតរបស់ប្រទេសអាស៊ានមួយនេះ ដែលជាផ្នែកនៃសមយុទ្ធរវាងកងទ័ពជើងគោកនិងនិងកងទ័ពជើងគោក ក្រោមគោលដៅពង្រឹងសមត្ថភាពការពារជាតិរបស់ទីក្រុងម៉ានីល ប្រឆាំងនឹងការគំរាមកំហែងពីខាងក្រៅ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី១ ខែមេសា ឆ្នាំ២០២៣។

កងទ័ពហ្វីលីពីននិងអាមេរិកសរុបជាង ៣,០០០នាក់ បានចូលរួមក្នុងការធ្វើសមយុទ្ធយោធាប្រចាំឆ្នាំ ដែលមានរយៈពេល៣សប្តាហ៍ ហៅថា សាឡាក់នីប (Salaknib) ខណៈកាលពីថ្ងៃសុក្រ រួមមាននូវការធ្វើលំហាត់បាញ់គ្រាប់ពិត នៃកាំភ្លើងចម្រុះ អាវុធប្រឆាំងរថក្រោះ ហើយនិង​ប្រព័ន្ធផ្លោងគ្រាប់រ៉ុក្កែត HIMARS។ សមយុទ្ធ សាឡាក់នីប បានចាប់ផ្តើមកាលពីថ្ងៃទី១៣ ខែមីនា ហើយនឹងបន្តដល់ថ្ងៃទី៤ ខែមេសា។

មិនតែប៉ុណ្ណោះ កំលុងចុងខែមេសានេះ ក៏នឹងមានការធ្វើសមយុទ្ធយោធារួមធំបំផុតមិនធ្លាប់មាន រវាងហ្វីលីពីននិងសហរដ្ឋអាមេរិកផងដែរ ដែលស្តែងឱ្យឃើញពីភាពប្រសើរឡើងនៃទំនាក់ទំនង របស់ទីក្រុងម៉ានីលជាមួយទីក្រុងវ៉ាស៉ីនតោន នៅក្រោមអាណត្តិដឹកនាំរបស់ប្រធានាធិបតី​ហ្វីលីពីនលោក ហ្វឺឌីណាន់ ម៉ាកូស ជូនៀ (Ferdinand Marcos Jr.)។ កាលពីខែកុម្ភៈ លោក ម៉ាកូស បានសម្រេចអនុញ្ញាតឱ្យអាមេរិកអាចប្រើប្រាស់មូលដ្ឋានយោធាហ្វីលីពីន បានប៉ុន្មានកន្លែងបន្ថែមទៀត ជាទង្វើដែលបង្កឱ្យចិនខឹងសម្បារ ហើយចោទទីក្រុងវ៉ាស៉ីនតោនថា កំពុងបង្កឱ្យមានភាពតានតឹងក្នុងតំបន់។

គួរបញ្ជាក់ថា សមយុទ្ធយោធាប្រចាំឆ្នាំ ហៅថា បាលីកាតាន់ (Balikatan) ក្នុងខែមេសានេះ នឹងមើលឃើញមានយោធិនចូលរួមសរុបខ្ទង់ ១៧,៦០០នាក់ ក្នុងនោះប្រហែល១២,០០០មកពីសហរដ្ឋអាមេរិក ហើយវាកើតឡើងក្នុងបរិបទដែលហ្វីលីពីនហៅថា ការបង្កើនសកម្មភាព​បង្កហេតុដោយចិន នៅតំបន់សមុទ្រចិនខាងត្បូង៕