(មូស្គូ)៖ កាលពីថ្ងៃសុក្រសប្តាហ៍នេះ វិមានក្រឹមឡាំងបាននិយាយថា អ្នកសារព័ត៌មានបរទេសទាំងអស់ដែលមានអាជ្ញាបណ្ណត្រឹមត្រូវ អាចបន្តធ្វើការងារនៅក្នុងប្រទេសរុស្ស៉ីបានជាធម្មតា បន្ទាប់ពីអ្នកកាសែតម្នាក់របស់សារព័ត៌មានអាមេរិក Wall Street Journal ទើបតែត្រូវបានឃាត់ខ្លួន ក្រោមការចោទប្រកាន់ពីបទធ្វើចារកម្ម។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី១ ខែមេសា ឆ្នាំ២០២៣។

អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានប្រាប់ក្រុមអ្នកសារព័ត៌មានដូច្នេះថា «អ្នកកាសែតទាំងអស់ ដែលមានការទទួលស្គាល់ត្រឹមត្រូវនៅទីនេះ... ខ្ញុំចង់សំដៅលើក្រុមអ្នកកាសែតបរទេស គឺអាចបន្តសកម្មភាពជាអ្នកសារព័ត៌មាន​របស់ពួកគេ នៅក្នុងប្រទេសរុស្ស៉ីបាន។ ពួកគេមិនប្រឈមការរឹតត្បិតអ្វីទាំងអស់ ហើយកំពុងធ្វើការធម្មតា»។

គួរបញ្ជាក់ថា លោក អ៉ីវ៉ាន់ ហ្កឺស្កូវិច (Evan Gershkovich) ដែលជាអ្នកឆ្លើយឆ្លងព័ត៌មានរបស់សារព័ត៌មានអាមេរិក The Wall Street Journal ប្រចាំនៅការិយាល័យទីក្រុងមូស្គូ ត្រូវបានអាជ្ញាធររុស្ស៉ីចាប់ខ្លួន កាលពីថ្ងៃព្រហស្បតិ៍សប្តាហ៍នេះ ក្រោមការចោទប្រកាន់​ពីបទធ្វើចារម្ម។ លោក ប៉េស្កូវ ក៏បានព្រមានផងដែរថា កុំឱ្យទីក្រុងវ៉ាស៉ីនតោនឆ្លើយតបមកវិញ តាមរយៈការបណ្តេញក្រុមអ្នកកាសែតរុស្ស៉ី ដែលកំពុងបំពេញការងារ នៅសហរដ្ឋអាមេរិកឱ្យសោះ។ ករណីនេះបានបង្កជាហានិភ័យ ដែលអាចធ្វើឱ្យទំនាក់ទំនង ដែលស្ថិតក្នុងស្ថានភាពអាក្រក់ស្រាប់រវាងអាមេរិកនិងរុស្ស៉ី ធ្លាក់ចុះដល់កម្រិតកាន់តែយ៉ាប់យ៉ឺនថែមទៀត៕