(តៃប៉ិ)៖ រដ្ឋាភិបាលក្រុងប៉េកាំងបានផ្ទុះកំហឹងគ្រាដែលមានដំណើរទស្សនកិច្ចរបស់មេដឹកនាំកោះតៃ វ៉ាន់ លោកស្រី សៃអ៊ឹងវ៉ិន ទៅកាន់សហរដ្ឋអាមេរិក។ តាមពិតដំណើរទស្សនកិច្ចរបស់លោកស្រី សៃ អ៊ឹងវ៉ិន មានគោលបំណងទៅកាន់ប្រទេសក្នុងតំបន់អាមេរិកឡាទីន ប៉ុន្តែតម្រូវឱ្យមានការ ឈប់សំចតក្នុងសហរដ្ឋអាមេរិក ខណៈដែលមានសេចក្តីរាយការណ៍បង្ហាញថា លោកស្រីសៃ អ៊ឹងវ៉ិន មានគម្រោងជួបជាមួយនឹង ប្រធានសភាតំណាងរាស្ត្រថ្មីអាមេរិកលោក ខេវិន ម៉ឹកខាស៊ី Kevin McCarthy។

ហេតុអ្វីបានជាដំណើរទស្សនកិច្ចរបស់លោកស្រីសៃអ៊ឹងវិន បានបង្កការ ក្តៅក្រហាយដល់ប្រទេសចិន, តើប្រទេសចិនបានបោះពាក្យសម្តីអ្វីខ្លះជុំវិញដំណើរទស្សនកិច្ចនេះ?

មេដឹកនាំកោះតៃវ៉ាន់ លោកស្រីសៃអ៊ឹងវ៉ិន កំពុងឈប់សំចតក្នុងសហរដ្ឋអាមេរិកក្នុងដំណើរ ទស្សនកិច្ចក្រៅប្រទេសទៅកាន់ប្រទេសក្នុងតំបន់អាមេរិកឡាទីន ប៉ុន្តែដំណើររបស់លោក ស្រីហាក់ដូចជាកំពុងបង្ហាញបំណងផ្សេងទៀតដែលបង្កឱ្យរដ្ឋាភិបាលក្រុងប៉េកាំងខឹងសម្បារជាខ្លាំង។ រដ្ឋាភិបាលក្រុងប៉េកាំងបានថ្លែងថា ដោយសារតែកោះតៃវ៉ាន់គឺជាផ្នែកមួយនៃទឹកដីរបស់ប្រទេសចិន ដូច្នេះដំណើរទស្សនកិច្ចផ្លូវរដ្ឋគឺតៃវ៉ាន់មិនអាចមានសិទ្ធិធ្វើទៅបានឡើយ។

លោកស្រីសៃ អ៊ឹងវិន បានឈប់សំចតក្នុងក្រុងញូយ៉កនៅថ្ងៃពុធទី២៩មីនា ក្នុងរង្វង់ការព្រមាន ពីប្រទេសចិនបើសិនជាលោកស្រីនឹងជួបប្រធានសភាតំណាងរាស្ត្រថ្មីអាមេរិក គឺលោក Kevin McCarthy ។ បើទោះបីជារដ្ឋាភិបាលក្រុងប៉េកាំង បានចាត់ទុកកោះតៃវ៉ាន់ គឺជាផ្នែកមួយនៃ ទឹកដីរបស់ខ្លួនក៏ដោយ ប៉ុន្តែលោកស្រីសៃ អ៊ឹងវ៉ិន បានបង្ហាញចេតនាចង់ផ្តាច់កោះតៃវ៉ាន់ជា ទឹកដីឯករាជ្យ ក្រោមការពឹងផ្អែកលើចំណាត់ការជួយពីសហរដ្ឋអាមេរិក ដែលបានព្រមានប្រទេសចិន ថារដ្ឋាភិបាលក្រុងវ៉ាស្ហ៊ីនតោន នឹងចាត់វិធានការណ៍យោធាទប់ទល់ការពារកោះ តៃវ៉ាន់ ប្រសិនណាបើរដ្ឋាភិបាលក្រុងប៉េកាំងហ៊ានប្រើកម្លាំងបង្ខំការបង្រួបបង្រួមជាតិ។

ជម្លោះរវាងប្រទេសចិននិងសហរដ្ឋអាមេរិកជុំវិញកោះតៃវ៉ាន់នេះបានបារម្ភជុំវិញការនឹងអាច ផ្ទុះសង្គ្រាមថ្មីមួយក្នុងតំបន់ឥណ្ឌូប៉ាស៊ីហ្វិក ខណៈដែលបណ្តាប្រទេសលើពិភពលោកជាច្រើន កំពុងរងចំហាយនៃវិបត្តិសេដ្ឋកិច្ចដោយសារតែឥទ្ធិពលនៃសង្គ្រាមរុស្ស៊ីនិងអ៊ុយក្រែនដែល បានអូសបន្លាយរយៈពេលជាងមួយឆ្នាំរួចមកនេះ។

កងកម្លាំងរំដោះប្រជាជនចិន កាលពីខែសីហាឆ្នាំ២០២២ បានធ្វើសមយុទ្ធដ៏ធំមួយព័ទ្ធជុំវិញ កោះតៃវ៉ាន់ម្តងរួចទៅហើយដោយសារតែការខឹងនឹងដំណើរទស្សនកិច្ចរបស់អតីតប្រធានស ភាអាមេរិកលោកស្រីណានស៊ីប៉េឡូស៊ី មកកាន់កោះតៃវ៉ាន់នាពេលនោះ។ ប្រទេសចិនបានព្រមានថា នឹងអាចប្រើកម្លាំងយោធាធ្វើការបង្រួបបង្រួមកោះតៃវ៉ាន់នេះ ប្រសិនបើមានលក្ខណៈចាំបាច់។ កងកម្លាំងប្រដាប់អាវុធកោះតៃវ៉ាន់បានថ្លែងក្នុងពេលនេះថា គេកំពុងតាមដានសកម្ម ភាពរបស់កងកម្លាំងរំដោះប្រជាជនចិនគ្រប់ពេលវេលា ក្នុងពេលអវត្តមានមេដឹកនាំលោកស្រីសៃអ៊ឹងវិន ដេលធ្វើដំណើរចាកចេញពីប្រទេសនាពេលនេះ។ លោកស្រីសៃ អ៊ឹងវ៉ិនបានថ្លែង មុន ពេលចាកចេញថាការគាបសង្កត់ពីខាងក្រៅ នឹងមិនអាចរារាំងការប្តេជ្ញាចិត្តរបស់លោក ស្រីក្នុងការធ្វើដំណើរចេញទៅកាន់ពិភពលោកនោះឡើយ។

លោកស្រី​ សៃ​ អេងវ៉ិន បានថ្លែងថា «យើងមានភាពស្ងប់ស្ងាត់ និងមានទំនុកចិត្ត នឹងមិនផ្តល់ ផលឬការបង្កហេតុនោះទេ។ តៃវ៉ាន់នឹងដើរយ៉ាងរឹងមាំលើផ្លូវនៃសេរីភាព និងលទ្ធិប្រជាធិប តេយ្យ ហើយចូលទៅក្នុងពិភពលោក។ ទោះបីជាផ្លូវនេះមានភាពលំបាក ប៉ុន្តែតៃវ៉ាន់មិនមែន តែម្នាក់ឯងនោះទេ»។

មិនមានសេចក្តីរាយការណ៍ថាតើក្នុងការឈប់សំចតនៅសហរដ្ឋអាមេរិកនោះ លោកស្រីសៃ អ៊ឹងវ៉ិននឹងធ្វើអ្វីខ្លះនោះឡើយ។ មន្ត្រីទូតតៃវ៉ាន់ក្នុងសហរដ្ឋអាមេរិកបាននិយាយថា​ រាល់ព្រឹត្តិ ការណ៍ទាំងអស់របស់លោកស្រីក្នុងសហរដ្ឋអាមេរិកនេះនឹងមិនត្រូវបានបង្ហើបឱ្យសារព័ត៌ មានដឹងនោះឡើយ។

ដំណើរទស្សនកិច្ចរបស់លោកស្រីសៃ​​ អ៊ឹងវិន ទៅកាន់ប្រទេសក្នុងតំបន់អាមេរិកឡាទីនគឺប្រទេស Guatamela និងប្រទេស Belize នាពេលនេះបានធ្វើឡើងខណៈដែលប្រទេស​ហុងឌុយរ៉ាស់ កាលពីថ្ងៃអាទិត្យកន្លងមកនេះ បានផ្លាស់ប្តូរគោលជំហរនយោបាយ ឈប់ទទួលស្គាល់ចិនតៃវ៉ាន់ ប៉ុន្តែបែរជំនួសមកវិញដោយសាធារណរដ្ឋប្រជាមានិតចិន។ បច្ចុប្បន្នក្នុងពិភព​​លោកនេះ ប្រទេសដែលទទួលស្គាល់ការទូតជាមួយកោះតៃវ៉ាន់មានចំនួនតែ១៣ប្រទេស តែប៉ុណ្ណោះ…ហើយក្នុងចំណោមប្រទេសទាំង១៣នោះ ប្រទេសធំៗដូចជាសហរដ្ឋអាមេរិក និង ឥណ្ឌាជាដើមគឺមិនមែនជាប្រទេសដែលគាំទ្រតៃវ៉ាន់នោះឡើយ។ ប៉ុន្តែសហរដ្ឋអាមេរិកបែរ ជា បង្ហាញការលូកដៃចូលក្នុងកិច្ចការផ្ទៃក្នុងរបស់ចិន ដោយប្រធានាធិបតីអាមេរិកលោកចូបៃដិន បានបញ្ជាក់ការប្តេជ្ញាចិត្តថានឹងប្រើកម្លាំងយោធាជួយតៃវ៉ាន់ បើសិនជាប្រទេសចិនហ៊ានប្រើ កម្លាំងហិង្សាដាក់លើតៃវ៉ាន់ដើម្បីការបង្រួបបង្រូមជាតិនោះ។ ប៉ុន្តែប្រទេសចិនបានបង្ហាញនូវ ជំហរដាច់ខាតវិញថា គេមិនបណ្តោយឱ្យតៃវ៉ាន់បាត់បង់ដោយសារតែអន្តរាគមន៍សហរដ្ឋអាមេ រិកចង់បំបែកទឹកដីចិនឱ្យបែកចេញពីគ្នានោះឡើយ។

មន្ត្រីនាំពាក្យចិនដែលគ្រប់គ្រងកិច្ចការកោះតៃវ៉ាន់លោកស្រី Zhu Fenglian បានថ្លែងក្នុងក្រុង ប៉េកាំងថា ប្រសិនណាបើលោកស្រីសៃអ៊ឹងវិនហ៊ានជួបជាមួយនឹងប្រធានសភាអាមេរិកលោក Kevin McCarthy មែននោះ ប្រទេសចិនពិតជានឹងចាត់វិធានការដើម្បីធ្វើការទប់ទល់ទៅវិញជាមិនខាន។

លោកស្រី Zhu Fenglian បានថ្លែងព្រមានថា «ប្រសិនណាបើមេដឹកនាំកោះតៃវ៉ាន់ធ្វើកិច្ចការ ពាក់ព័ន្ធជាមួយនឹងប្រធានសភាអាមេរិកក្នុងអម្លុងដំណើរទស្សនកិច្ចក្នុងសហរដ្ឋអាមេរិកនោះ វានឹងក្លាយជាការបង្កហេតុថ្មីមួយទៀតដែលវារំលោភធ្ងន់ធ្ងរខ្លាំងលើគោលនយោបាយចិនតែមួយ បង្កឱ្យប៉ះពាល់ដល់ដែនអធិបតេយ្យភាពជាតិចិន​ និងជាការបំផ្លាញសន្តិភាពនិងស្ថិរភាព ក្នុងជ្រោយដែនកោះតៃវ៉ាន់ផងទៀត។ យើងសូមប្រឆាំងនឹងជំនួបនេះ និងចាត់វិធានការ ប្រឆាំងដាច់ខាតដើម្បីធ្វើការតបតទៅវិញ»។

នៅជាមួយគ្នានេះផងដែរ មន្ត្រីលេខាធិការទី៣ស្ថានទូតចិនប្រចាំសហរដ្ឋអាមេរិក លោក ស្រីស៊ូ ហ័រយ៉ិន Xu Hueyuan បានថ្លែងព្រមានបន្ថែមថា បើពិតជាមានជំនួបនោះកើតឡើងមែន វានឹងនាំឱ្យមានការប្រឈមមុខគ្នាដ៏ខ្លាំងក្លាមួយទៀតរវាងចិននិងសហរដ្ឋអាមេរិក។ មន្ត្រី ស្ថានទូតចិនដដែលបានថ្លែងថា គេធ្លាប់បាននិយាយបង្ហាញប្រាប់ភាគីអាមេរិកជាច្រើនដងរួច មកហើយថាផលវិបាកដែលកើតឡើងទាំងអស់គឺមិនមែនមកពីប្រទេសចិននោះទេ ប៉ុន្តែគឺ វាបណ្តាលមកពីសហរដ្ឋអាមេរិកនោះទៅវិញទេ។
រដ្ឋមន្ត្រីការបរទេសចិន លោក ឈិន កាង (Qin Gang) កាលពីសប្តាហ៍មុនបានថ្លែងព្រមាន ដល់កោះតៃវ៉ាន់ជុំវិញការចាត់វិធានការទប់ទល់ បើសិនបន្តធ្វើនយោបាយផ្តាច់ខ្លួនចេញពីប្រទេសចិន។

លោកឈិនកាង Qin Gang បានថ្លែងថា​ «ការភ្ជាប់គោលការណ៍នឹងនយោបាយចិនតែមួយ គឺជាជំរើស ដ៏ត្រឹមត្រូវស្របតាមយុត្តិធម៌ជាអន្តរជាតិ និងស្របតាមទំនោរនៃពេលវេលា បាន ធ្វើឱ្យឈ្នះលើទឹកចិត្តប្រជាពលរដ្ឋ និងជាទំនោរអភិវឌ្ឍន៍ទូទៅថែមទៀត»។ លោកបានធ្វើសារព្រមានថា «យើងសូមប្រាប់អាជ្ញាធរតៃវ៉ាន់ថា ភាពពាក់ព័ន្ធនឹងសកម្មភាពផ្តាច់ខ្លួនដើម្បីការចង់ឯករាជ្យតៃវ៉ាន់នោះ គឺបានប្រឆាំងនឹងឆន្ទៈនិងផលប្រយោជន៍របស់ប្រជាជាតិចិន និងប្រឆាំង ទំនោរប្រវត្តិសាស្ត្រ និងជាការដាក់ទោសគ្មានថ្ងៃអាចគេចរួចបានឡើយ»។

បើទោះបីជាមិនមានសេចក្តីរាយការណ៍បញ្ជាក់អំពីគម្រោងថ្ងៃដែលនឹងត្រូវជួបគ្នារវាងលោក ស្រីសៃអ៊ឹងវិន ជាមួយនឹងប្រធានសភាតំណាងរាស្ត្រអាមេរិកនោះក៏ដោយ ប៉ុន្តែយោងតាមទី ភ្នាក់ងាររ៉យតឺបានបង្ហើបថា គឺអាចនឹងមានសមាជិកសភាអាមេរិកច្រើនដល់២០នាក់ដែលមាន គម្រោងចង់អមដំណើររបស់លោក Kevin McCarthy ដើម្បីជួបលោកស្រីសៃអ៊ឹងវ៉ិន ដែលមុននេះ គម្រោងចង់ជួបគឺនៅបណ្ណាល័យប្រធានាធិបតី Ronald Reagan ក្បែរក្រុង Los Angeles ។

បណ្ណាល័យអាមេរិកនោះ នៅមិនទាន់បានបញ្ជាក់ជុំវិញការជួបនេះនៅឡើយទេ ប៉ុន្តែបើ យោងតាមគំរោងធ្វើដំណើរ លោកស្រី សៃ អ៊ឹងវិន ក្នុងពេលដែលវិលត្រឡប់មកពីតំបន់អាមេរិក ឡាទីននោះវិញ នឹងត្រូវឈប់សំចតក្នុងក្រុង Los Angeles សហរដ្ឋអាមេរិកនេះ មុននឹងវិលត្រ ឡប់មកកោះតៃវ់ាន់វិញ។ ដំណើរឈប់សំចតក្នុងក្រុង Los Angeles ដែលនឹងរំពឹងថាមានការ ជួបគ្នាជាមួយនឹងប្រធានសភាតំណាងរាស្ត្រអាមេរិកនោះ នឹងកើតឡើងក្នុងសប្តាហ៍ក្រោយ។

រដ្ឋមន្ត្រីការបរទេសកោះតៃវ៉ាន់ លោក Joseph Wu ពាក់ព័ន្ធការគំរាមរបស់ចិនជុំវិញដំណើរ ទស្សនកិច្ចរបស់លោកស្រីសៃអ៊ឹងវិន បានធ្វើប្រតិកម្មរបស់ខ្លួនក្នុងសប្តាហ៍នេះ។

រដ្ឋមន្ត្រីការបរទេសតៃវ៉ាន់បានថ្លែងថា​ ប្រទេសចិនតែងតែឆ្លៀតធ្វើការកេងប្រយោជន៍ទៅលើ ព្រឹត្តិការណ៍នានាដើម្បីចោទប្រកាន់លើទំនាក់ទំនងការទូតរបស់តៃវ៉ាន់។ លោកថាដំណើរ របស់មេដឹកនាំកោះតៃវ៉ាន់ធ្វើទស្សនកិច្ចនៅប្រទេស Belize និង Guatamela គឺជាដំណើរបើកចំហរ ប៉ុន្តែប្រទេសចិនបានធ្វើអាជីវកម្មលើព្រឹត្តិការណ៍ទាំងនេះដោយមានចេតនា។​

មន្ត្រីនាំពាក្យក្រសួងការបរទេសចិន លោកស្រី Mao Ning បានថ្លែងចោទថា ដំណើររបស់ លោកស្រី​សៃ​អ៊ឹងវ៉ិន​ ចេញក្រៅប្រទេសនេះ គឺជាដំណើរដែលបិទបាំងកិច្ចការនយោបាយ ចង់ បំបែកកោះតៃវ៉ាន់ជាកោះឯករាជ្យពីប្រទេសចិន។

ស្ត្រីនាំពាក្យចិនបានថ្លែងថាការឈប់សំចតក្នុងសហរដ្ឋអាមេរិកគឺមូលហេតុក្លែងក្លាយបង្កើត ដោយមេដឹកនាំតៃវ៉ាន់តែប៉ុណ្ណោះ។ មូលហេតុពិតប្រាកដគឺការស្វែងរកច្រកទម្លុះចេញនិងការ ចង់នាំតៃវ៉ាន់ឯករាជ្យចេញពីប្រទេសចិន។ លោកស្រីបានថ្លែងថា «ចិនមិនមែនចេះតែប្រតិកម្ម ហួសហេតុដាក់លើសហរដ្ឋអាមេរិក ដែលធ្វើជាមើលមិនឃើញ ឃុបឃិតនិងបន្តគាំទ្រកម្លាំង ចិនតៃវ៉ាន់ដែលចង់បានឯករាជ្យនោះឡើយ»។

លោកស្រី សៃ អ៊ឹងវិន ក្នុងដំណើរឈប់សំចតក្នុងក្រុងញូយ៉កសប្តាហ៍នេះ សេចក្តីរាយការណ៍ បានបង្ហាញថា លោកស្រីមេដឹកនាំកោះតៃវ៉ាន់ នឹងមានកម្មវិធីជប់លៀងជាមួយចិនតៃវ៉ាន់ អាមេរិកនិងក្រុមចិនតៃវ៉ាន់នៅក្នុងញូយ៉កថែមទៀតនិងនៅថ្ងៃព្រហស្បតិ៍នេះក៏មានការជួប ជាមួយក្រុម Think Tank នៃវិទ្យាស្ថាន Hudson ដែលចិនតៃវ៉ាន់តែងផ្តល់ជំនួយជាសំខាន់ដល់ ក្រុម Think Tank ទាំងនេះ។ លោកស្រី សៃ អ៊ឹងវ៉ិន ត្រូវគេរាយការណ៍ពីការជួបជាមួយនឹងអង្គ ការអាមេរិកមួយ ចំនួនថែមទៀត។

មន្ត្រីនៃពាក្យសន្តិសុខជាតិរបស់សេតវិមានលោក John Kirby បានថ្លែងព្រមានប្រទេសចិន ថា សូមកុំឱ្យប្រើការឈប់សំចតរបស់លោកស្រីសៃអ៊ឹងវ៉ិនជាលេសដើម្បីបង្កើនសកម្មភាពប្រ ឆាំងនឹងកោះតៃវ៉ាន់។

លោក John Kirby បានថ្លែងថាសហរដ្ឋអាមេរិកដឹងថាស្ថានការណ៍កំពុងតែតានតឹងនាពេល នេះរវាងសហរដ្ឋអាមេរិកនិងចិន ប៉ុន្តែរដ្ឋាភិបាលក្រុងប៉េកាំងត្រូវរក្សាខ្សែទំនាក់ទំនងបើកចំ ហររវាងគ្នាទៅវិញទៅមក។ លោក John Kirby នៅបាននិយាយទៀតថាសហរដ្ឋអាមេរិកចង់ រៀបចំសាជាថ្មីនូវដំណើរទស្សនកិច្ចរបស់រដ្ឋមន្ត្រីការបរទេសអាមេរិកលោក Anthony Blinken ទៅកាន់ប្រទេសចិនសាជាថ្មី បន្ទាក់ការអាក់ខានដោយសារតែព្រឹត្តិការណ៍បាញ់ប៉េងប៉ោង ហោះរបស់ចិនកន្លងមក៕