(គួឡាឡាំពួ)៖ នាយករដ្ឋមន្រ្តីម៉ាឡេស៉ី លោក លោក អាន់វ៉ា អ៉ីប្រាហ៉ីម នៅថ្ងៃសុក្រនេះ បាននិយាយថា ប្រទេសអាស៊ានមួយនេះ នឹងមិន​អនុញ្ញាតឱ្យប្រទេសមហាអំណាចណាមួយ មកបង្គាប់បញ្ជាលើការសម្រេចចិត្តឬទិសដៅអនាគតរបស់ខ្លួនបានឡើយ។ នេះបើតាមការចេញ​ផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៣១​ ខែមីនា ឆ្នាំ២០២៣។

យោងតាមការដកស្រង់សម្តីដោយសារព័ត៌មានម៉ាឡេស៉ី បឺណាម៉ា (Bernama) លោក អាន់វ៉ា បាននិយាយយ៉ាងដូច្នេះថា «មិនគួរមាននរណាគេផ្សេង មកដឹកមុខ​យើងឡើយ។ ក្នុងនាមជាប្រទេសដែលមានសេរីភាពនិងឯករាជ្យពេញលេញ យើងចាំបាច់ត្រូវតែសម្រេចដោយខ្លួនឯងផ្ទាល់ ទៅលើអ្វីដែលល្អបំផុតសម្រាប់យើង។ ហើយយើងធ្វើការសម្រេចចិត្ត ដោយឈរលើគុណតម្លៃ​និងគោលការណ៍ស្នូល ដូចជាធានាថាយើងមានអភិបាលកិច្ច និងគោលនយោបាយដែលល្អប្រសើរ ហើយផ្តល់អត្ថប្រយោជន៍ដល់​ប្រទេសជាតិ ក៏ដូចជាប្រជាជនយើង»។

លោកនាយករដ្ឋមន្រ្តីម៉ាឡេស៉ីបានថ្លែងដូចខាងលើ ក្នុងចម្លើយឆ្លើយតបចំពោះសំណួរទាក់ទងទៅនឹង ការប្រជែងឥទ្ធិពលគ្នារវាងចិននិងសហរដ្ឋអាមេរិក កំលុងព្រឹត្តិការណ៍មួយ នៅឯសាកលវិទ្យាល័យ ស៉ីងហួ (Tsinghua) នៃទីក្រុងប៉េកាំង។ ដោយឡែក ពាក់ព័ន្ធជាមួយនឹងទំនាក់​ទំនងរបស់ម៉ាឡេស៉ីជាមួយចិនវិញនោះ លោក អាន់វ៉ា បាននិយាយថា ម៉ាឡេស៉ីមិនមើលឃើញចិនជាគូប្រជែងឬការគំរាមកំហែងឡើយ បើទោះបីប្រទេសទាំងពីរ មានភាពមិនចុះសម្រុងគ្នាមួយចំនួនក៏ដោយ។

លោក អាន់វ៉ា បានបន្ថែមថា ម៉ាឡេស៉ីចង់កសាងទំនាក់ទំនងឱ្យល្អប្រសើរជាមួយប្រទេសទាំងអស់ រាប់បញ្ចូលទាំងចិននិងអាមេរិក។ បើតាមមេដឹកនាំម៉ាឡេស៉ីរូបនេះ ចិននិងសហរដ្ឋអាមេរិកផ្ទាល់ ក៏ត្រូវតែយល់ផងដែរថា ថាមវ័ន្តនៃទំនាក់ទំនងការទូតអន្តរជាតិសព្វថ្ងៃនេះគឺត្រូវបានផ្លាស់ប្តូរ ហើយសង្រ្គាមរវាងរុស្ស៉ីនិងអ៊ុយក្រែននាពេលបច្ចុប្បន្ន ក៏កំពុងជះឥទ្ធិពលទៅលើពិភពលោកទាំងមូលផងដែរ។

គួរបញ្ជាក់ថា លោក អាន់វ៉ា កំពុងស្ថិតក្នុងដំណើរបំពេញទស្សនកិច្ចនៅប្រទេសចិន ដែលជាលើកដំបូងគិតចាប់តាំងពីលោក បានក្លាយជា​នាយករដ្ឋមន្រ្តីម៉ាឡេស៉ីកាលពីខែវិច្ឆិកា ឆ្នាំមុន។ កាលពីរសៀលថ្ងៃសុក្រនេះ លោក អាន់វ៉ា បានជួបពិភាក្សាគ្នាជាមួយប្រធានាធិបតីចិន លោក ស៉ី ជិនពីង បន្ទាប់ពីលោកបានទៅដល់ទីក្រុងប៉េកាំង កាលពីថ្ងៃពុធ៕