(តៃប៉ិ)៖ ក្រសួងការពារជាតិតៃវ៉ាន់បានឱ្យដឹងថា នៅថ្ងៃសុក្រនេះ យន្តហោះយោធាចិនសរុបចំនួន៩គ្រឿង បានធ្វើដំណើរឆ្លងខ្សែបន្ទាត់​មេដ្យាននៃច្រកសមុទ្រតៃវ៉ាន់ ដើម្បីធ្វើប្រតិបត្តិការល្បាតក្នុងលក្ខណៈពង្រឹងសមត្ថភាពត្រៀមប្រយុទ្ធ ខណៈទីក្រុងតៃប៉ិបានថ្កោលទោសថា វាគឺជាចល័តដែលមិនសមហេតុសមផល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៣១ ខែមីនា ឆ្នាំ២០២៣។

ក្រសួងការពារជាតិតៃវ៉ាន់បាននិយាយ ក្នុងសេចក្តីថ្លែងការណ៍ថា យន្តហោះយោធាចិនទាំង៩គ្រឿង បានហោះឆ្លងនៅម្តុំចំណុចភាគខាងជើង ខាងត្បូង និងកណ្តាល នៃខ្សែបន្ទាត់មេដ្យានរបស់ច្រកសមុទ្រតៃវ៉ាន់ ដែលបម្រើជាព្រំប្រទល់មិនផ្លូវការរវាងភាគីទាំងពីរ។ យោធាតៃវ៉ាន់ក៏បានធ្វើ​ការឆ្លើយតបទៅវិញ តាមរយៈការចល័តយន្តហោះ និងនាវារបស់ខ្លួន ដើម្បីឃ្លាំមើលស្ថានការណ៍។

ក្រសួងការពារជាតិតៃវ៉ាន់បានបន្តថា ការចល័តយន្តហោះយោធាចិនខាងលើ គឺទង្វើបង្កភាពតានតឹងដោយចេតនា នៅច្រកសមុទ្រតៃវ៉ាន់ ហើយមិនត្រឹមប៉ះពាល់ដល់ សុខសន្តិភាពនិងស្ថិរភាពប៉ុណ្ណោះទេ តែក៏ជះឥទ្ធិពលអវិជ្ជមានទៅលើសន្តិសុខ និងការអភិវឌ្ឍសេដ្ឋកិច្ចនៅក្នុង​តំបន់ផងដែរ។ ក្រសួងការពារជាតិតៃវ៉ាន់ បានថ្កោលទោសទង្វើរបស់ចិនថា ជាសកម្មភាពដែលមិនសមហេតុសមផលទាល់តែសោះ។

គួរបញ្ជាក់ថា ទោះបីទីក្រុងប៉េកាំងមិនដែលទទួលស្គាល់ជាផ្លូវការ ចំពោះខ្សែបន្ទាត់មេដ្យាននៅច្រកសមុទ្រតៃវ៉ាន់ក៏ដោយ យោធាចិនទើបតែ​បានចាប់ផ្តើម ចល័តនាវានិងយន្តហោះយោធាឱ្យឆ្លងកាត់វា​ បន្ទាប់ពីដំណើរទស្សនកិច្ចដ៏ចម្រូងចម្រាសនៅកោះតៃវ៉ាន់ កាលពីខែសីហា ឆ្នាំមុន ដោយលោកស្រី ណានស៉ី ផេឡូស៉ី ដែលកាលណោះនៅជាប្រធានសភាតំណាងរាស្រ្តអាមេរិក ប៉ុណ្ណោះ។ ពេលនោះភាពតានតឹង​បានកើនឡើងយ៉ាងក្តៅគគុក នៅតំបន់ច្រកសមុទ្រតៃវ៉ាន់។

ដោយឡែកឥឡូវនេះ កម្តៅភាពតានតឹងហាក់កំពុងកើនឡើងជាថ្មី ស្របពេលដែលមេដឹកនាំកោះតៃវ៉ាន់ លោកស្រី សៃ អ៉ីងវិន កំពុងស្ថិតនៅ​សហរដ្ឋអាមេរិក ក្នុងដំណើរបំពេញទស្សនកិច្ចឆ្ពោះទៅកាន់តំបន់អាមេរិកកណ្តាល។ លោកស្រី សៃ ត្រូវគេរំពឹងថានឹងជួបជាមួយលោក ខេវិន ម៉ាកខាធី ដែលជាប្រធានសភាតំណាងរាស្រ្តអាមេរិកបច្ចុប្បន្ន ក្នុងទីក្រុងឡូសអាន់ជេឡេស នៅតាមផ្លូវត្រឡប់ទៅកាន់តៃវ៉ាន់វិញ ក្នុងខែមេសាខាងមុខ។ ក្នុងសប្តាហ៍នេះ ទីក្រុងប៉េកាំងដែលចាត់ទុកកោះតៃវ៉ាន់ ជាផ្នែកមិនអាចកាត់ផ្តាច់បាននៃទឺកដីរបស់ប្រទេសចិននោះ បានចេញមុខព្រមានធ្ងន់ៗរួចជាស្រេចហើយថា ខ្លួនមុខជានឹងចាត់វិធានការសងសឹក ប្រសិនបើជំនួបរវាងលោកស្រី សៃ ហើយនិងលោក ម៉ាកខាធី ពិតជាកើតឡើងមែន៕