(យូអិន)៖ កាលពីថ្ងៃសុក្រសប្តាហ៍នេះ សហរដ្ឋអាមេរិកបានចោទប្រកាន់ចិនថា ព្យាយាមជួយលាក់បាំងអំពើឃោរឃៅរបស់កូរ៉េខាងជើង មិនឱ្យពិភពលោកបានឃើញ តាមរយៈការរារាំងការផ្សាយផ្ទាល់លើប្រព័ន្ធអ៉ីនធើណិត នូវកិច្ចប្រជុំក្រៅផ្លូវការមួយនៃក្រុមប្រឹក្សាសន្តិសុខ UN ស្តីពីការចោទប្រកាន់នៃការប្រព្រឹត្តអំពើរំលោភសិទ្ធិមនុស្ស នៅក្នុងប្រទេសកូរ៉េខាងជើង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី១៨ ខែមីនា ឆ្នាំ២០២៣។
ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី លីនដា ថូម៉ាស-គ្រីនហ្វៀល (Linda Thomas-Greenfield) បានថ្លែងក្នុងកិច្ចប្រជុំក្រុមប្រឹក្សាសន្តិសុខ UN កាលពីថ្ងៃសុក្រថា សមាជិកមួយចំនួននៃក្រុមប្រឹក្សានេះ គឺដូចជាស្ម័គ្រចិត្តខ្លាំងជ្រុលពេកហើយ ក្នុងការជួយការពាររបបដឹកនាំទីក្រុងព្យុងយ៉ាង ពីការទទួលខុសត្រូវ ដោយលោកស្រីចង់សំដៅដោយប្រយោលទៅលើចិន។
រីឯប្រធានបេសកកម្មចិនប្រចាំ UN លោក ស៉ីង ជីសេង (Xing Jisheng) បាននិយាយថា កិច្ចប្រជុំខាងលើ ដែលរៀបចំដោយអាមេរិក និងអាល់បានី គឺពុំមានភាពស្ថាបនាអ្វីបន្តិចសោះឡើយ។ លោក ស៉ីង បានលើកឡើងដូច្នេះថា «ដោយមិនអាចជួយបន្ធូរបន្ថយភាពតានតឹង ផ្ទុយទៅវិញកិច្ចប្រជុំនេះមានតែធ្វើឱ្យភាពតានតឹងកាន់តែឡើង ដូច្នេះវាគឺជាសកម្មភាពពុំមានការទទួលខុសត្រូវមួយ។ ហេតុនេះហើយ ការប្រើប្រាស់ទូរទស្សន៍អនឡាញ UN WebTV ដើម្បីផ្សាយផ្ទាល់ គឺជាការខ្ជះខ្ជាយធនធានរបស់ UN ទទេៗ»។
គួរបញ្ជាក់ថា សមាជិកទាំង១៥ នៃក្រុមប្រឹក្សាសន្តិសុខ UN ចាំបាច់ត្រូវព្រមព្រៀងគ្នាជាឯកច្ឆន្ទ ដើម្បីអាចឱ្យកិច្ចប្រជុំក្រៅផ្លូវការដូចខាងលើ ត្រូវផ្សាយតាមអនឡាញដោយអង្គការសហប្រជាជាតិបាន ខណៈក្រុមអ្នកការទូតនៅ UN បាននិយាយថា វាគឺជារឿងកម្រមួយដែលការផ្សាយ ត្រូវបានរារាំងយ៉ាងដូច្នេះ។ យ៉ាងណាក៏ដោយ កិច្ចប្រជុំកាលពីថ្ងៃសុក្រ នៅតែបានប្រព្រឹត្តទៅដោយលក្ខណៈបើកចំហ និងមានការចូលរួមពីក្រុមអ្នកសារព័ត៌មាន។
កន្លងមក ចិនក៏ដូចជារុស្ស៉ីធ្លាប់លើកហេតុផលថា ក្រុមប្រឹក្សាសន្តិសុខ UN ដែលទទួលបន្ទុករក្សាសន្តិភាពនិងសន្តិសុខអន្តរជាតិ មិនគួរមកជជែកគ្នាអំពីបញ្ហាសិទ្ធិមនុស្សឡើយ ដោយប្រទេសទាំងពីរយល់ថា កិច្ចពិភាក្សាជុំវិញប្រធានបទបែបនេះ គួរតែធ្វើឡើងដោយស្ថាប័ន UN ដទៃទៀតដែលពាក់ព័ន្ធ ដូចជាក្រុមប្រឹក្សាសិទ្ធិមនុស្ស ឬមហាសន្និបាត UN ជាដើម៕