(អ៉ីស្លាម៉ាបាដ)៖ អ្នកនាំពាក្យរបស់ប៉ូលិសនិយាយថា ជនសង្ស័យបំផ្ទុះគ្រាប់បែកអត្តឃាតម្នាក់ បានបើកម៉ូតូបំបុករថយន្តរបស់ប៉ូលិស នៅឯភាគនិរតីនៃប្រទេសប៉ាគីស្ថាន នៅថ្ងៃចន្ទនេះ បណ្តាលឲ្យមន្រ្តីប៉ូលិសចំនួន ៩នាក់ស្លាប់។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី៦​ ខែមីនា ឆ្នាំ២០២៣។

អ្នកនាំពាក្យរបស់ប៉ូលិស លោក មេហ៍មូត ខាន់ ណូទីហ្សៃ (Mehmood Khan Notizai) បានប្រាប់ទីភ្នាក់ងារសារព័ត៌មាន Reuters ឲ្យដឹងថា ការវាយប្រហារបានកើតឡើងនៅក្នុងទីក្រុងស៉ិបប៊ី (Sibbi) ចម្ងាយប្រហែល ១៦០គីឡូម៉ែត្រ ភាគខាងកើតនៃទីក្រុងឃ្យូអ៉ីតថា (Quetta) ដែលជារដ្ឋធានីរបស់តំបន់បាឡូឈីសតាន់ (Balochistan)។ មន្ត្រីមន្ទីរពេទ្យបាននិយាយថា យ៉ាងហោចណាស់ប៉ូលិសចំនួន៧នាក់ បានរងរបួសនៅក្នុងការវាយប្រហារនេះ ដែលជាការវាយប្រហារថ្មីក្រោយបំផុតដែលផ្តោតលើបុគ្គលិកប៉ូលិស នៅក្នុងប្រទេសប៉ាគីស្ថាន។

គួរបញ្ជាក់ថា រហូតមកដល់ពេលនេះ នៅមិនទាន់មានក្រុមណាចេញមុខទទួលខុសត្រូវសម្រាប់ការវាយប្រហារនេះទេ។ អស់ជាច្រើនឆ្នាំមកនេះ ក្រុមមួយដែលគេហៅថាជាទ័ពព្រៃបាឡូច (Baloch) បានប្រយុទ្ធគ្នាជាមួយរដ្ឋាភិបាលប៉ាគីស្ថាន ដោយចោទប្រកាន់ថា បានកេងចំណេញលើធនធានឧស្ម័ន និងរ៉ែ ដ៏សម្បូរបែបរបស់តំបន់បាឡូឈីសតាន់ (Balochistan)៕