(ហាណូយ)៖ ប្រភពពីក្នុងគណបក្សផ្ទាល់បានបង្ហើបឱ្យដឹងថា គណបក្សកុម្មុយនិស្តវៀតណាមបានសម្រេចជ្រើសតាំង លោក វ៉ូ វ៉ាន់ធួង (Vo Van Thuong) ជាប្រធានាធិបតីថ្មីរបស់ប្រទេសវៀតណាម ក្រោយការលាលែងពីតំណែងរបស់ប្រធានាធិបតីមុន កាលពីខែមករាកន្លងទៅ ចំពោះមុខយុទ្ធនាការបោសសំអាត​អំពើពុករលួយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១ ខែមីនា ឆ្នាំ២០២៣។

នៅថ្ងៃពុធនេះ រដ្ឋាភិបាលនិងគណបក្សកុម្មុយនិស្តវៀតណាម បានប្រកាសថា គណៈកម្មាធិការមជ្ឈិមរបស់បក្ស បានឯកភាពគ្នាលើការជ្រើសតាំងប្រធានាធិបតីថ្មី ប៉ុន្តែមិនបានបញ្ជាក់ឈ្មោះឡើយ។ យ៉ាងណាក្តី ប្រភពចំនួន២ ចេញពីក្នុងគណបក្សកុម្មុយនិស្តវៀតណាមផ្ទាល់ បានអះអាងថា ​បេក្ខជនប្រធានាធិបតីថ្មីនោះ គឺលោក វ៉ូ វ៉ាន់ធួង។ លោក​ ធួង មានអាយុ៥២ឆ្នាំ ជាសមាជិកវ័យក្មេងជាងគេបង្អស់ នៅក្នុងការិយាល័យនយោបាយដ៏មានឥទ្ធិពលរបស់បក្ស និងត្រូវបានចាត់ទុកជា មនុស្សដែលមានទំនាក់ទំនងយ៉ាងជិតស្និទ្ធ ជាមួយអគ្គលេខាធិការបក្សគឺលោក ង្វៀន ភូទ្រុង (Nguyen Phu Trong) ដែលជាបុគ្គលមានអំណាចបំផុត​នៅក្នុងប្រទេសវៀតណាម។

លោក ង្វៀន ភូទ្រុង នេះហើយ គឺជាអ្នកផ្តួចផ្តើមឡើងនូវយុទ្ធនាការបោសសំអាតអំពើពុករលួយដ៏តឹងរ៉ឹង ដែលកន្លងមកនេះបានមើលឃើញមន្រ្តីវៀតណាមខ្ទង់រាប់រយនាក់ ត្រូវប្រឈមការស៉ើបអង្កេតនិងទទួលពិន័យ ខណៈជាច្រើននាក់បានបាត់អស់តំណែង ដែលក្នុងនោះរួមមានទាំង អតីតប្រធានាធិបតីលោក ង្វៀន សួនហ្វុក (Nguyen Xuan Phuc) ហើយនិងអតីតឧបនាយករដ្ឋមន្រ្តី២រូប។ ការជ្រើសតាំងលោក វ៉ូ វ៉ាន់ធួង នឹងត្រូវឆ្លងកាត់ការបោះឆ្នោតអនុម័តជាផ្លូវការ ដោយសភាវៀតណាម ដែលនឹងត្រូវបើកកិច្ចប្រជុំវិសាមញ្ញមួយ នៅថ្ងៃព្រហស្បតិ៍សប្តាហ៍នេះ។

គួរបញ្ជាក់ថា នៅក្នុងប្រទេសវៀតណាម ប្រធានាធិបតីមានតួនាទីជាប្រមុខរដ្ឋ ប៉ុន្តែមិនមែនជាប្រមុខរដ្ឋាភិបាលនោះឡើយ។ តំណែងនេះស្ថិតក្នុងចំណោម មុខតំណែងនយោបាយកំពូលៗទាំង៤ របស់ប្រទេសវៀតណាម ដោយមុខតំណែង៣ទៀតគឺ អគ្គលេខាធិការបក្សកុម្មុយនិស្ត នាយករដ្ឋមន្រ្តី ហើយនិងប្រធានសភា៕