(ប៉េកាំ)៖ ចិនបាននិយាយថា ខ្លួនជំរុញឱ្យមានកិច្ចសន្ទនា និងដំណោះស្រាយដោយសន្តិវិធីសម្រាប់វិបត្តិអ៊ុយក្រែន បើទោះបីជាមានការព្រមានពីសហរដ្ឋអាមេរិកថា ទីក្រុងប៉េកាំងអាចពិចារណាការផ្គត់ផ្គង់អាវុធដល់សម្ព័ន្ធមិត្តរបស់ខ្លួនគឺរុស្ស៊ីក៏ដោយ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី២៧ ខែកុម្ភៈ ឆ្នាំ២០២៣។
ក្រសួងការបរទេសចិនបាននិយាយថា ខ្លួនបានរក្សាទំនាក់ទំនងជាមួយគ្រប់ភាគីនៃវិបត្តិ រួមទាំងទីក្រុងកៀវ ហើយជំហររបស់ខ្លួនគឺច្បាស់លាស់។
អ្នកនាំពាក្យក្រសួងការបរទេស លោកស្រី Mao Ning នៅថ្ងៃចន្ទនេះបានប្រាប់សន្និសីទសារព័ត៌មាននៅទីក្រុងប៉េកាំងថា «ខ្លឹមសារសំខាន់គឺការអំពាវនាវដើម្បីស្វែងរកសន្តិភាព លើកកម្ពស់ការសន្ទនា និងលើកកម្ពស់ដំណោះស្រាយនយោបាយចំពោះវិបត្តិ (អ៊ុយក្រែន)នេះ»។
គួរបញ្ជាក់ថា ចិនដែលបានប្រកាសសម្ព័ន្ធភាព «គ្មានព្រំដែន» ជាមួយរុស្ស៊ីមិនយូរប៉ុន្មាន មុនពេលការលុកលុយកាលពីមួយឆ្នាំមុន បានបដិសេធមិនថ្កោលទោសការវាយប្រហារនេះ ហើយកាលពីសប្តាហ៍មុនបានចេញផ្សាយផែនការ ១២ចំណុចដែលអំពាវនាវឱ្យមានបទឈប់បាញ់ និងការបន្ថយបន្តិចម្តងៗដោយភាគីទាំងពីរ។
ក្រុងកៀវបានឆ្លើយតបដោយទទួលយកទិដ្ឋភាពមួយចំនួន នៃផែនការ ខណៈដែលបានសង្កត់ធ្ងន់ថា គ្មានសន្តិភាពទេ បើគ្មានការដកខ្លួនទាំងស្រុងរបស់រុស្ស៊ី។
ប្រធានាធិបតីអ៊ុយក្រែន លោក Volodymyr Zelensky បាននិយាយនៅក្នុងការបង្ហោះនៅលើកម្មវិធីផ្ញើសារ Telegram នៅថ្ងៃចន្ទនេះថា «ខ្ញុំពិតជាចង់ឱ្យមានជ័យជម្នះកើតឡើងនៅឆ្នាំនេះ។ ហើយសម្រាប់រឿងនេះ យើងមានអ្វីគ្រប់យ៉ាង ការលើកទឹកចិត្ត ទំនុកចិត្ត មិត្តភក្តិ និងការទូត»៕
