(រ៉ូម)៖ ប្រព័ន្ធផ្សព្វផ្សាយក្នុងស្រុករបស់អ៉ីតាលី បានរាយការណ៍ថា មានមនុស្សយ៉ាងហោចណាស់ចំនួន៤០នាក់ បានបាត់បង់ជីវិត បន្ទាប់ពីទូកដឹកជនអន្តោប្រវេសន៍១គ្រឿង បានលិចនៅក្បែរឆ្នេរនៃតំបន់កាឡាប្រៀ (Calabria) ភាគអាគ្នេយ៍ប្រទេសអ៉ីតាលី នៅថ្ងៃអាទិត្យនេះ។ នេះបើតាមការចេញផ្សាយដោយទីភ្នាក់ងារព័ត៌មាន AFP នៅថ្ងៃអាទិត្យ ទី២៦ ខែកុម្ភៈ ឆ្នាំ២០២៣។

សាកសពមនុស្សយ៉ាងហោចចំនួន២៨នាក់ ត្រូវបានរលកនាំមកទើរលើមាត់ឆ្នេរនៃរីសតមួយកន្លែង ក្នុងខេត្តក្រូតូណេ (Crotone) ខណៈសាកសពមនុស្សមួយចំនួនទៀត ក៏ត្រូវបានប្រទះឃើញអណ្តែតលើផ្ទៃសមុទ្រផងដែរ។ ក្នុងចំណោមអ្នកដែលបានបាត់បង់ជីវិត គឺរួមមានទាំងទារកនិងកុមារ ហើយមនុស្សប្រហេល៤០នាក់នៅមានជីវិត។ ប្រព័ន្ធផ្សព្វផ្សាយអ៉ីតាលីបានអះអាងថា នៅលើទូកដែលជួបគ្រោះថ្នាក់នោះ រួមមានជនអន្តោប្រវេសន៍មកពី​អ៉ីរ៉ង់ ប៉ាគីស្ថាន និងអាហ្វហ្កានីស្ថានជាដើម សរុបជាង១០០នាក់ ហើយវាបានបោកខ្ទប់នឹងថ្ម កំលុងស្ថានភាពអាកាសធាតុអាក្រក់លើផ្ទៃសមុទ្រ។

គួរបញ្ជាក់ អ៉ីតាលីគឺជាគោលដៅចូលចតចម្បងសម្រាប់ជនអន្តោប្រវេសន៍ ដែលព្យាយាមភៀសខ្លួនចូលមកក្នុងតំបន់អឺរ៉ុប តាមផ្លូវសមុទ្រ។ ផ្លូវធ្វើដំណើរដែល​គេហៅថា ផ្លូវមេឌីទែរ៉ាណេភាគកណ្តាល គឺជាផ្លូវធ្វើដំណើរដ៏គ្រោះថ្នាក់បំផុតមួយរបស់ពិភពលោក។ គិតចាប់តាំងពីឆ្នាំ២០១៤មក មនុស្សចំនួន២០,៣៣៣នាក់ បានបាត់បង់ជីវិតឬបាត់់ខ្លួន នៅភាគកណ្តាលសមុទ្រមេឌីទែរ៉ាណេ៕