(មីនស្កិ៍)៖ មន្រ្តីជាន់ខ្ពស់បេឡារុសម្នាក់ កាលពីថ្ងៃសៅរ៍សប្តាហ៍នេះបាននិយាយថា ប្រទេសបេឡារុសដែលជាសម្ព័ន្ធមិត្តរបស់រុស្ស៉ី ស្ថិតនៅជាប់ព្រំប្រទល់ភាគខាងជើងរបស់អ៊ុយក្រែន មានកម្លាំងប្រហែល១.៥លាននាក់ ដែលអាចបម្រើជាទាហាន ក្រៅពីកងកម្លាំងប្រដាប់អាវុធរបស់ខ្លួនផ្ទាល់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី២៦ ខែកុម្ភៈ ឆ្នាំ២០២៣។

ប្រធានក្រុមប្រឹក្សាសន្តិសុខបេឡារុស លោក អាឡិចសាន់ដឺ វ៉ូលហ្វូវិច (Alexander Volfovich) បានអះអាងថា ក្រៅពីសមាជិកនៃកងកម្លាំងប្រដាប់អាវុធផ្ទាល់ បេឡារុសមានកម្លាំងរហូតដល់១.៥លាននាក់ទៀត ដែលអាចបម្រើជាទាហាន ក្នុងករណីច្បាប់អាជ្ញាសឹកត្រូវបានប្រកាស និងស្ថានភាពសេដ្ឋកិច្ចត្រូវបានផ្លាស់ប្តូរទៅ​ជា ស្ថានភាព​ពេលមានសង្រ្គាម។

យោងតាមទិន្នន័យឆ្នាំ២០២២ បេឡារុសដែលមានប្រជាជនសរុបខ្ទង់៩.៣លាននាក់ មានកងកម្លាំងជាទាហានអាជីពសរុបប្រហែល ៦០,០០០នាក់។ ក្នុងខែកុម្ភៈនេះ ប្រធានាធិបតីបេឡារុស លោក អាឡិចសាន់ដឺ លូកាសិនកូ (Alexander Lukashenko) ទើបតែបានចេញបញ្ជាឱ្យបង្កើតកងកម្លាំងស័្មគ្រចិត្តថ្មីមួយ ដើម្បីការពារទឹកដីចំនួនដល់១៥០,០០០នាក់។ លោកប្រធានាធិបតីបេឡារុស ធ្លាប់បានអះអាងម្តងហើយម្តងទៀតថា កងទ័ពរបស់ប្រទេសលោក នឹងចេញច្បាំងលុះត្រាតែបេឡារុស​រងការវាយប្រហារមុនពីប្រទេសដទៃ។

គួរបញ្ជាក់ថា លោក លូកាសិនកូ បានផ្តល់ការគាំទ្រដល់សមភាគីរុស្ស៉ីគឺ លោក វ៉្លាឌីមៀ ពូទីន ក្នុងសង្រ្គាមឈ្លានពានរយៈពេល១ឆ្នាំមកនេះ នៅប្រទេសអ៊ុយក្រែន ក្នុងនោះរួមមានទាំងតាមរយៈការអនុញ្ញាតឱ្យលោក ពូទីន ប្រើប្រាស់ទឹកបេឡារុស ដើម្បីឈ្លានពានលើអ៊ុយក្រែន កាលពីកំលុងដំណាក់កាលដំបូង និងតាមរយៈការ​បើកឱ្យរុស្ស៉ីបង្វឹកកងទ័ពដែលខ្លួនទើបនឹងកែន នៅក្នុងប្រទេសបេឡារុស៕