(ញូដេលី)៖ កាលពីថ្ងៃសៅរ៍សប្តាហ៍នេះ ក្រុមរដ្ឋមន្រ្តីហិរញ្ញវត្ថុ G20 មិនអាចស្វែងរកការឯកភាពគ្នាបាន លើសេចក្តីថ្លែងការណ៍រួមដែលមានគោលដៅថ្កោលទោស ប្រទេសរុស្ស៉ីសម្រាប់សង្រ្គាមឈ្លានពាននៅអ៊ុយក្រែន ក្រោយមានការជំទាស់ពីចិននិងរុស្ស៉ីផ្ទាល់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី២៦ ខែកុម្ភៈ ឆ្នាំ២០២៣។

ឥណ្ឌាក្នុងនាមជាប្រធានប្តូរវេន G20 បានទទួលបន្ទុករៀបចំកិច្ចប្រជុំខាងលើ នៅឯទីក្រុងបង់ហ្កាល័រ (Bangalore) នៃប្រទេសរបស់ខ្លួន ហើយមានការស្ទាក់ស្ទើរ ក្នុងការលើកឡើងអំពីបញ្ហាសង្រ្គាមអ៊ុយក្រែន ប៉ុន្តែក្រុមប្រទេសលោកខាងលិចបានទទូចថា ពួកគេមិនអាចផ្តល់ការគាំទ្រចំពោះលទ្ធផលណាមួយ ដែលមិនរួមមាន​ការថ្កោលទោសនោះឡើយ។ ការខ្វះការឯកភាពគ្នាក្នុងចំណោមសមាជិក G20 បែបនេះមានន័យថា ឥណ្ឌាត្រូវបង្ខំឱ្យងាកមកចេញត្រឹម «សេចក្តីសង្ខេបនិងឯកសារលទ្ធផល​របស់ប្រទេសជាប្រធាន» វិញ ដែលក្នុងនោះគ្រាន់តែផ្តល់ខ្លឹមសារបូកសរុបលទ្ធផល នៃកិច្ចប្រជុំរយៈពេល២ថ្ងៃ និងគូសបញ្ជាក់ពីការខ្វែងគំនិតគ្នា។

សេចក្តីសង្ខេបនោះបានលើកឡើងដូច្នេះថា «សមាជិកភាគច្រើនប្រកាន់ជំហរថ្កោលទោសជាខ្លាំង ចំពោះសង្រ្គាមនៅអ៊ុយក្រែន ហើយសង្កត់ធ្ងន់ថា វាកំពុងតែបង្កទុក្ខវេទនាយ៉ាង​ធំធេងចំពោះមនុស្ស និងធ្វើឱ្យស្ថានភាពសេដ្ឋកិច្ចពិភពលោកកាន់តែផុយស្រួយ ដោយសារតែការរំខានដល់ខ្សែចង្វាក់ផ្គត់ផ្គង់ ហានិភ័យចំពោះស្ថិរភាពហិរញ្ញវត្ថុ និងការអូសបន្លាយនៃបញ្ហាអសន្តិសុខស្បៀងនិងផ្នែកថាមពល»។

សេចក្តីសង្ខេបដដែលបានបន្តទៀតថា «មានការយល់ឃើញនិងវាយតម្លៃខុសៗគ្នា ចំពោះស្ថានការណ៍និងទណ្ឌកម្ម» ដោយចង់សំដៅលើ ចំណាត់ទណ្ឌកម្មរបស់​សហរដ្ឋអាមេរិក រួមជាមួយក្រុមប្រទេសអឺរ៉ុបនិងប្រទេសដទៃទៀត ដែលមានគោលដៅដាក់ពិន័យលើរុស្ស៉ី សម្រាប់ការឈ្លានពាននៅអ៊ុយក្រែន និងទប់ស្កាត់ប្រភព​ចំណូលរបស់ទីក្រុងមូស្គូ។

គួរបញ្ជាក់ថា លទ្ធផលនៃកិច្ចប្រជុំ G20 ខាងលើ គឺស្រដៀងទៅនឹងលទ្ធផលនៃកិច្ចប្រជុំកំពូលរវាងមេដឹកនាំប្រទេស G20 នៅកោះបាលី កាលពីខែវិច្ឆិកា ឆ្នាំមុនដែរ នៅពេលឥណ្ឌូណេស៉ីជាម្ចាស់ផ្ទះ ក៏បានចេញសេចក្តីប្រកាសចុងក្រោយមួយ ដែលទទួលស្គាល់ការខ្វែងគំនិតគ្នារវាងសមាជិក ជុំវិញបញ្ហាសង្រ្គាមអ៊ុយក្រែន៕