(ប៉េកាំង)៖ ក្រុមហ៊ុនផលិតបាឡុងឧតុនិយមរបស់ចិន Zhuzhou Rubber Research & Design Institute បានអះអាងថា ខ្លួនមិនជាប់ពាក់ព័ន្ធអ្វីទៅនឹងករណីបាឡុងចារកម្មដែលបាញ់ទម្លាក់ដោយសហរដ្ឋអាមេរិក កាលពីដើមខែកុម្ភៈនេះទេ ហើយក៏មិនមែនជាក្រុមហ៊ុនយោធានោះដែរ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃសៅរ៍ ទី២៥ ខែកុម្ភៈ ឆ្នាំ២០២៣។
Zhuzhou Rubber ជាអង្គភាពបុត្រសម្ព័ន្ធក្រុមហ៊ុន ChemChina ដែលជាក្រុមហ៊ុនគីមីដ៏ធំរបស់រដ្ឋចិន បានឲ្យដឹងថា ខ្លួនបានចូលរួមក្នុងការផលិតបាឡុងពីជ័រធម្មជាតិមិនប៉ះពាល់ដល់បរិស្ថាន ដោយអនុលោមតាមច្បាប់ និងបទប្បញ្ញត្តិទាំងអស់។
នៅក្នុងសេចក្តីថ្លែងការណ៍មួយ ក្រុមហ៊ុន ChemChina បានគូសបញ្ជាក់ថា «ផលិតផលរបស់យើងត្រូវបានប្រើប្រាស់សម្រាប់ការព្យាករណ៍អាកាសធាតុប្រចាំថ្ងៃ ដោយស្ថានីយឧតុនិយម ហើយមិនមានពាក់ព័ន្ធអ្វីនឹងឧប្បត្តិហេតុបាឡុងដូចដែលសេចក្តីរាយការណ៍របស់សហរដ្ឋអាមេរិកបានលើកឡើងនោះទេ»។
គួរបញ្ជាក់ថា បាឡុងចិនដែលហោះលើទឹកដីសហរដ្ឋអាមេរិក ត្រូវបានបាញ់ទម្លាក់នៅឆ្នេរសមុទ្រអាត្លង់ទិក តាមការបញ្ជារបស់ប្រធានាធិបតីអាមេរិក លោក ចូ បៃដិន។ ទីក្រុងប៉េកាំង ចាត់ទុកការដោះស្រាយឧប្បត្តិហេតុបាឡុងនេះ ថាជាទង្វើមិនសមហេតុផលដែលរំលោភលើបទដ្ឋានអន្តរជាតិ៕
