(មូស្គូ)៖ ប្រធានាធិបតីរុស្ស៉ីលោក វ៉្លាឌីមៀ ពូទីន នាថ្ងៃព្រហស្បតិ៍នេះ បាននិយាយថា រុស្ស៉ីនឹងផ្តោតកាន់តែសំខាន់ទៅលើ ការពង្រឹងកងកម្លាំងនុយក្លេអ៊ែររបស់ខ្លួន តាមរយៈការដាក់ពង្រាយមីស៉ីលបាលិស្ទីគជំនាន់ថ្មី បង្កើនចំនួនអាវុធល្បឿនលឿនជាងសំឡេង និងបន្ថែមនាវាមុជទឹកនុយក្លេអ៊ែរថ្មីៗ។ នេះបើតាមការចេញ​ផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៣ ខែកុម្ភៈ ឆ្នាំ២០២៣។

ក្នុងការថ្លែងសារនាឱកាស «ទិវាអ្នកការពារបេតុភូមិ» លោកប្រធានាធិបតីរុស្ស៉ី បានលើកឡើងយ៉ាងដូច្នេះថា «ដូចកាលពីមុន គឺយើងនឹងផ្តោតកាន់តែសំខាន់ទៅលើ ការពង្រឹងអាវុធនុយក្លេអ៊ែរត្រីមុខរបស់យើង» ដោយលោកចង់សំដៅលើមីស៉ីលនុយក្លេអ៊ែរ ដែលបាញ់ចេញពីដីគោក ពីផ្ទៃសមុទ្រ និងពីលើអាកាស។ លោក ពូទីន បាននិយាយថា មីស៉ីលនុយក្លេអ៊ែរហៅថា សាម៉ាត (Sarmat) ប្រភេទបាញ់ចេញពីមូលដ្ឋានក្រោមដី នឹងត្រូវដាក់ពង្រាយក្នុងឆ្នាំនេះ។

មីស៉ីល RS-28 Sarmat ដែលប្រើប្រាស់ឥន្ធនៈរាវនិងមានរហស្សនាមថា សាតាន់-២ (Satan-2) ត្រូវបានប្រកាសជាលើកដំបូងដោយលោក ពូទីន កាលពីឆ្នាំ២០១៨។ មីស៉ីលដែលមានបណ្តោយប្រវែង៣៥ម៉ែត្រនេះ អាចធ្វើដំណើរបានចម្ងាយរហូតដល់ ១៨,០០០គីឡូម៉ែត្រ និងផ្ទុកក្បាលគ្រាប់នុយក្លេអ៊ែរយ៉ាង​ហោច១០គ្រាប់ ដែលមានសមត្ថភាពកំណត់គោលដៅខុសៗគ្នា។

បន្ថែមពីនេះ លោក ពូទីន បានបន្តថា រុស្ស៉ីនឹងបង្កើនការផលិតទ្រង់ទ្រាយធំ នៃមីស៉ីលល្បឿនលឿនជាងសំឡេង គីនហ្សាល់ (Kinzhal) ដែលបាញ់ចេញពី​យន្តហោះ ហើយចាប់ផ្តើមការផ្គត់ផ្គង់ទ្រង់ទ្រាយធំនៃមីស៉ីលល្បឿនលឿនជាងសំឡេង ហ្សៀខុន (Ziron) ដែលបាញ់ចេញពីនាវា។ មិនតែប៉ុណ្ណោះ នៅក្នុង​ពេលប៉ុន្មានឆ្នាំខាងមុខ នឹងមានការដាក់ដំណើរការ នាវាមុជទឹកដើរដោយថាមពលនុយក្លេអ៊ែរថ្មីៗ នៃគម្រោង Borei-A ចំនួន៣គ្រឿងបន្ថែមទៀត។ កាលពី​ចុងឆ្នាំមុន រុស្ស៉ីទើបតែសម្រេចការសាងសង់ នាវាមុជទឹកថ្មីមួយឈ្មោះថា Emperor Alexander III ដែលជានាវាមុជទឹកគ្រឿងទី៧ នៃគម្រោង Borei-A ដែលមួយគ្រឿងៗអាចផ្ទុកមីស៉ីលនុយក្លេអ៊ែរ Bulava បាន១៦គ្រាប់។

គួរបញ្ជាក់ថា កាលពីថ្ងៃអង្គារសប្តាហ៍នេះ លោក វ៉្លាឌីមៀ ពូទីន បានប្រកាសផ្អាកកិច្ចព្រមព្រៀងគ្រប់គ្រងអាវុធនុយក្លេអ៊ែរ ដែលនៅសល់ចុងក្រោយបំផុត ជាមួយសហរដ្ឋអាមេរិក។ យ៉ាងណាក្តី កាលពីថ្ងៃពុធ ប្រធានាធិបតីអាមេរិក លោក ចូ បៃដិន បានប្រកាសថា មិនមានសញ្ញាបង្ហាញថា រុស្ស៉ីកំពុងពិចារណា​ប្រើប្រាស់អាវុធនុយក្លេអ៊ែរនោះទេ ក្រោយការព្យួសន្ធិសញ្ញា New START ក៏ដោយ៕