(ប៉ារីស)៖ រដ្ឋអាជ្ញាប្រចាំតំបន់បាននិយាយថា គ្រូបង្រៀនម្នាក់នៅសាលាមួយនៅភាគនិរតីនៃប្រទេសបារាំង ត្រូវបានសិស្សចាក់ដោយកាំបិតរហូតដល់ស្លាប់ នៅពេលកំពុងបង្រៀ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃពុធ ទី២២ ខែកុម្ភៈ ឆ្នាំ២០២៣។
អ្នកគ្រូបង្រៀនភាសាអេស្ប៉ាញអាយុ ៥២ឆ្នាំម្នាក់ កំពុងបង្រៀននៅសាលាមួយក្នុងទីក្រុងឆ្នេរសមុទ្រ Saint-Jean-de-Luz នៅពេលដែលសិស្សអាយុ ១៦ឆ្នាំបានវាយប្រហារគាត់ដោយកាំបិត។
ជនរងគ្រោះបានទទួលជំនួយសង្គ្រោះបឋមនៅកន្លែងកើតហេតុ ប៉ុន្តែបានស្លាប់ដោយសាររបួសធ្ងន់ធ្ងរពេក នេះបើតាមរដ្ឋអាជ្ញា លោក Jérôme Brill បានប្រាប់ទីភ្នាក់ងារ AFP។ លោកបានបន្ថែមថា សិស្សដែលជាជនបង្កហេតុត្រូវបានចាប់ខ្លួន។
កាសែតបារាំង Sud Ouest បាននិយាយថា ជនវាយប្រហារបានចូលទៅក្នុងថ្នាក់រៀន ហើយបានចាក់សោរទ្វា បន្ទាប់មកក៏វាយប្រហារលើគ្រូបង្រៀន ខណៈពេលដែលនាងកំពុងបង្រៀនភាសាអេស្ប៉ាញ។
ប្រព័ន្ធផ្សព្វផ្សាយក្នុងស្រុកបានរាយការណ៍ថា សិស្សនេះអាចមានបញ្ហាសុខភាពផ្លូវចិត្ត។ ពួកគេបាននិយាយថា នៅក្នុងដំណាក់កាលនៃការស៊ើបអង្កេតនេះ មិនមានការចង្អុលបង្ហាញណាមួយដែលថា ឧបទ្ទវហេតុនេះពាក់ព័ន្ធនឹងភេរវកម្មនោះទេ។
គួរបញ្ជាក់ថា សាលានេះគឺជាសាលាឯកជនកាតូលិកមួយ ដែលមានទីតាំងនៅជិតកណ្តាលទីក្រុង Saint-Jean-de-Luz ដែលជារមណីយដ្ឋានរដូវក្តៅដ៏ល្បីល្បាញនៅក្នុងប្រទេសបារាំង៕