(ហ្សាការតា)៖ ប្រទេសឥណ្ឌូនេស៊ីដែលជាមេដឹកនាំប្តូរវេនបច្ចុប្បន្ន នៃសមាគមប្រជាជាតិអាស៊ីអាគ្នេយ៍ (អាស៊ាន) និងចិន បាននិយាយថា ប្រទេសទាំងពីរនឹងបង្កើនការចរចាលើក្រមប្រតិបត្តិសមុទ្រចិនខាងត្បូង។ នេះបើយោងតាមការចេញផ្សាយដោយ​ ទីភ្នាក់ងារសារព័ត៌មាន AFP នៅថ្ងៃពុធ ទី២២ ខែកុម្ភៈ ឆ្នាំ២០២៣។

រដ្ឋមន្ត្រីការបរទេសឥណ្ឌូណេស៊ី លោកស្រី Retno Marsudi និងសមភាគីចិនរបស់ លោក Qin Gang បាននិយាយបែបនេះទៅកាន់ប្រព័ន្ធផ្សព្វផ្សាយនៅថ្ងៃពុធនេះ ក្នុងអំឡុងទស្សនកិច្ចការងាររបស់ លោក Qin នៅប្រទេសឥណ្ឌូនេស៊ី។

លោក Qin កំពុងបំពេញទស្សនកិច្ចការងាររយៈពេលប៣ថ្ងៃតាមការអញ្ជើញរបស់ លោកស្រី Marsudi ដែលរដ្ឋមន្ត្រីទាំងពីរបានពិភាក្សាអំពីបញ្ហាតំបន់ និងទ្វេភាគី។

នៅក្នុងសេចក្តីថ្លែងការណ៍រួមរបស់ពួកគេទៅកាន់ប្រព័ន្ធផ្សព្វផ្សាយ លោកស្រី Marsudi បាននិយាយថា ប្រទេសឥណ្ឌូនេស៊ី និងអាស៊ានចង់បានសមុទ្រចិនខាងត្បូងជាទីប្រកបដោយសន្តិភាព និងស្ថិរភាព។

ដោយសំដៅលើអនុសញ្ញាអង្គការសហប្រជាជាតិស្តីពីច្បាប់សមុទ្រដែលប្រទេសចិនបានផ្តល់សច្ចាប័ន លោកស្រីបាននិយាយថា «ការគោរពច្បាប់អន្តរជាតិ ជាពិសេសច្បាប់សមុទ្រឆ្នាំ ១៩៨២ គឺជាមូលដ្ឋានគ្រឹះ»។

លោកស្រីបានបន្ថែមថា ប្រទេសឥណ្ឌូនេស៊ី និងសមាគមប្រជាជាតិអាស៊ីអាគ្នេយ៍ចង់បង្កើតក្រមសីលធម៌មួយ ដែលប្រកបដោយប្រសិទ្ធភាព គោលបំណង និងអាចអនុវត្តបាន។

ខាងភាគីចិន លោក Qin បាននិយាយថា សង្រ្គាមត្រជាក់ថ្មី និងការប្រកួតប្រជែងរវាងមហាអំណាចធំៗ មិនគួរលេចឡើងនៅក្នុងតំបន់អាស៊ីប៉ាស៊ីហ្វិកនោះទេ។ ហើយ ប្រទេសនៅក្នុងតំបន់ក៏មិនគួរត្រូវបានបង្ខំឱ្យចូលភាគីណាមួយនោះដែរ។

លោក​បាន​បន្ថែម​ថា ចិន​គាំទ្រ​ឯករាជ្យភាព​ជា​យុទ្ធសាស្ត្រ​របស់​អាស៊ាន និង​គោរព​ភាព​កណ្តាល​របស់​អាស៊ាន​ក្នុង​រចនាសម្ព័ន្ធ​តំបន់៕