(តេហេរ៉ង់)៖ ប្រព័ន្ធផ្សព្វផ្សាយក្នុងស្រុកនៅប្រទេសអ៉ីរ៉ង់ បានឱ្យដឹងថា មេដឹកនាំកំពូលនៃប្រទេសអ៉ីរ៉ង់ លោក អាយ៉ាតូឡោះ អាលីខាមេណៃ (Ayatollah Ali Khamenei) បានសម្រេចផ្តល់ការលើកលែង និងបន្ធូរបន្ថយទោសជាប់ពន្ធនាគារ សម្រាប់អ្នកទោសសរុបរហូតដល់ខ្ទង់រាប់ម៉ឺននាក់ ក្នុងនោះរួមមានមួយចំនួនជា បាតុករដែលត្រូវបានចាប់ខ្លួន កំលុងចលនាបាតុកម្មប្រឆាំងរដ្ឋាភិបាល កាលពីពេលកន្លងទៅនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី៦ ខែកុម្ភៈ ឆ្នាំ២០២៣។

យ៉ាងណាក៏ដោយ ការលើកលែងនិងបន្ធូរបន្ថយទោសខាងលើ គឺធ្វើឡើងដោយមានលក្ខខណ្ឌ។ វានឹងមិនត្រូវអនុវត្តចំពោះពលរដ្ឋមានសញ្ជាតិពីរ ដែលកំពុងជាប់​ឃុំខ្លួន នៅក្នុងប្រទេសអ៉ីរ៉ង់ឡើយ។ ម៉្យាងវិញទៀត អ្នកដែលជាប់ចោទពីបទធ្វើចារកម្មឱ្យបរទេស ឬអ្នកដែលមានទំនាក់ទំនងជាមួយ ក្រុមដែលជាសត្រូវរបស់​​សាធារណរដ្ឋអ៉ីស្លាមមួយនេះ ក៏នឹងមិនទទួលបានការលើកលែងឬបន្ធូរបន្ថយទោសដែរ។ លោក អាលីខាមេណៃ បានសម្រេចធ្វើយ៉ាងដូច្នោះ គឺដើម្បីជាការគោរព​ដល់ឱកាសគម្រប់ខួបនៃបដិវត្តន៍អ៉ីស្លាម ឆ្នាំ១៩៧៩។ លោក អាយ៉ាតូឡោះ អាលីខាមេណៃ បានក្លាយជាមេដឹកនាំកំពូលទាំងផ្នែកសាសនានិងនយោបាយ របស់ប្រទេសអ៉ីស្លាមមួយនេះ តាំងតែពីឆ្នាំ១៩៨៩មក។

គួរបញ្ជាក់ថា អ៉ីរ៉ង់បានជួបប្រទះការធ្វើបាតុកម្មយ៉ាងកក្រើក នៅទូទាំងប្រទេស ចាប់តាំងពីនារីវ័យ២២ឆ្នាំម្នាក់ ឈ្មោះ ម៉ាស្សា អាមីនី (Mahsa Amini) បានបាត់បង់ជីវិត កំលុងពេលជាប់ឃុំឃាំងរបស់ប៉ូលិសសីលធម៌អ៉ីរ៉ង់ កាលពីខែកញ្ញា ឆ្នាំ២០២២។ ប្រជាជនអ៉ីរ៉ង់មកពីគ្រប់ជាន់ថ្នាក់ បាននាំគ្នាចូលរួម​ក្នុងសកម្មភាពតវ៉ាទាំងនោះ ដែលបានក្លាយជាបញ្ហាប្រឈមដ៏ធំបំផុតមួយ ចំពោះរដ្ឋាភិបាលអ៉ីរ៉ង់ គិតចាប់តាំងបដិវត្តន៍ឆ្នាំ១៩៧៩មក។ អង្គការ​សិទ្ធិមនុស្ស បានអះអាងថា មនុស្សប្រហែល២០,០០០នាក់ ត្រូវបានចាប់ខ្លួនដោយជាប់ពាក់ព័ន្ធនឹងបាតុកម្ម ក្នុងចំណោមនោះមួយចំនួនត្រូវបានប្រហារជីវិត។ ទីក្រុងតេហេរ៉ង់បានចោទថា សកម្មភាពតវ៉ាទាំងនេះ ត្រូវបានបំផុសបំផុលដោយសត្រូវបរទេសរបស់អ៉ីរ៉ង់៕