(ប៊ែកឡាំង)៖ អ្នកនាំពាក្យរដ្ឋាភិបាលអាល្លឺម៉ង់បាននិយាយថា អាល្លឺម៉ង់បានអនុញ្ញាតឱ្យក្រុមហ៊ុនផលិតរថក្រោះបញ្ជូនរថក្រោះប្រភេទ Leopard 1 ទៅកាន់អ៊ុយក្រែន ដែលជាការជំរុញមួយផ្សេងទៀតសម្រាប់ក្រុងកៀវ ខណៈដែលប្រទេសនេះកំពុងស្វែងរកអាវុធធុនធ្ងន់ ដើម្បីទប់ទល់នឹងកងកម្លាំងរបស់ទីក្រុងម៉ូស្គូ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃសុក្រ ទី០៣ ខែកុម្ភៈ ឆ្នាំ២០២៣។

លោក Stephen Hepistreet បាននិយាយនៅពេលត្រូវបានសួរអំពីរថក្រោះខ្លារខិន Leopard 1 ក្នុងសន្និសីទសារព័ត៌មានមួយថា «ខ្ញុំអាចបញ្ជាក់បានថា ... អាជ្ញាប័ណ្ណអនុញ្ញាតឲ្យនាំចេញបានចេញហើយ»។

ប៉ុន្តែលោក​បដិសេធ​មិន​ផ្តល់​ព័ត៌មាន​បន្ថែម​ទេ ដោយ​និយាយ​ថា​ព័ត៌មាន​លម្អិត​បន្ថែម​អាច​នឹង​លេច​ចេញ​នៅ​ប៉ុន្មាន​ថ្ងៃ ​និង​សប្តាហ៍​ខាង​មុខទៀតនេះ។

គួរបញ្ជាក់ថា រថក្រោះខ្លារខិនប្រភេទ Leopard 1 ដែលជាសេរីមុនរថក្រោះ Leopard 2 បានចូលបម្រើសេវាកម្មជាលើកដំបូងនៅក្នុងទសវត្សរ៍ឆ្នាំ១៩៦០ ហើយវាត្រូវបានប្រើប្រាស់យ៉ាងទូលំទូលាយដោយកងទ័ពនៅទូទាំងទ្វីបអឺរ៉ុប។

ការអនុញ្ញាតនេះ ធ្វើឡើងបន្ទាប់ពីប្រទេសអាល្លឺម៉ង់បានសន្យាផ្តល់ដល់ប្រទេសអ៊ុយក្រែន នូវរថខ្លារខិន Leopard 2 ចំនួន ១៤គ្រឿងពីឃ្លាំងស្តុកយោធារបស់ខ្លួន ខណក្រុមហ៊ុនផលិតក៏ចង់បញ្ជូនរថក្រោះប្រភេទនេះដែលស្តុកទុកផងដែរ។

ខណៈពេលដែលប្រទេសជាច្រើនបានសន្យាផ្តល់ឧបករណ៍យោធាដល់អ៊ុយក្រែនយ៉ាងច្រើនសន្ធឹកសន្ធាប់នាប៉ុន្មាន​សប្តាហ៍ចុងក្រោយនេះ ទីក្រុងកៀវបាន និងកំពុងទាមទារឱ្យមានយន្តហោះចម្បាំង Tiger ទំនើបបន្ថែមទៀត ដែលត្រូវបានគេមើលឃើញថា ជាគន្លឹះក្នុងការទម្លុះខ្សែសត្រូវ៕