(អូស្លូ)៖ នាយករដ្ឋមន្រ្តីន័រវែស បានប្រកាសឱ្យដឹងនៅថ្ងៃសុក្រនេះថា ប្រទេសរបស់លោក នឹងធ្វើការបញ្ជាទិញរថក្រោះ Leopard 2 ដែលផលិតដោយអាល្លឺម៉ង់ ចំនួន៥៤គ្រឿង សម្រាប់កងទ័ពជើងគោករបស់ខ្លួន ពីក្រុមហ៊ុនអាល្លឺម៉ង់ ក្រោស-ម៉ាហ្វៃ វេកម៉ាន គ្រុប (Krauss-Maffei Wegmann Group)។ នេះបើតាមការចេញផ្សាយដោយ​ ទីភ្នាក់ងារព័ត៌មាន AFP នៅថ្ងៃសុក្រ ទី៣ ខែកុម្ភៈ ឆ្នាំ២០២៣។

នាយករដ្ឋមន្រ្តីន័រវែស លោក យ៉ូណាស់ ហ្កាស្ត័រ (Jonas Gahr Store) បានថ្លែងក្នុងសន្និសីទសារព័ត៌មានថា «យើងនឹងធានាថា ពួកយើងមានរថក្រោះប្រភេទដូចគ្នាទៅនឹង បណ្តាប្រទេសជិតខាងនៅតំបន់អឺរ៉ុបខាងជើង ព្រមទាំងសម្ព័ន្ធមិត្តសំខាន់ៗ​ជាច្រើនទៀត នៅក្នុងអង្គការណាតូ (NATO)»។ បើតាមលោក ហ្កាស្ត័រ ន័រវែសដែលមានព្រំប្រទល់ជាប់រុស្ស៉ីដែរនោះ ក៏នឹងទទួល​បានជម្រើសដើម្បីទិញរថក្រោះ ១៨គ្រឿងបន្ថែម នាពេលក្រោយទៀតផង។

គួរបញ្ជាក់ថា កន្លងមកនេះ ន័រវែសបានពិចារណាក្នុងការជ្រើសរើសទិញរថក្រោះថ្មីៗ រវាងរថក្រោះ Leopard 2 A7 របស់អាល្លឺម៉ង់ និងរថក្រោះ K2 Black Panther ដែលផលិតដោយក្រុមហ៊ុន ហ៉ីយុនដាយ រ៉ូតឹម (Hyundai Rotem) របស់កូរ៉េខាងត្បូង។ ន័រវែសក៏​ស្ថិតក្នុងចំណោមប្រទេសលោកខាងលិច ដែលបានសន្យាផ្តល់រថក្រោះឱ្យទៅអ៊ុយក្រែនផងដែរ។ បច្បុប្បន្ន ប្រទេសអឺរ៉ុបខាងជើងមួយនេះ មានរថក្រោះ Leopard ប្រហែល៣៦គ្រឿង៕