(ប៉េកាំង)៖ ក្រសួងការបរទេសចិននាថ្ងៃអង្គារនេះ បានថ្កោលទោសកិច្ចសន្ទនាតាមទូរស័ព្ទ រវាងប្រធានាធិបតីជាប់ឆ្នោតរបស់សាធារណរដ្ឋឆែក គឺលោក ភីតឺ ផាវែល (Petr Pavel) ហើយនិងប្រធានាធិបតីតៃវ៉ាន់ លោកស្រី សៃ អ៉ីងវិន ដោយចោទថា លោក ផាវែល ក្រឡាស់សម្តីនិងខ្វះការគួរឱ្យជឿទុកចិត្ត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ​ ទី៣១ ខែមករា ឆ្នាំ២០២៣។

អ្នកនាំពាក្យក្រសួងការបរទេសចិន លោកស្រី ម៉ាវ នីង (Mao Ning) បានថ្លែងក្នុងសន្និសីទសារព័ត៌មានប្រចាំថ្ងៃថា ប្រទេសចិនមានការមិនពេញចិត្តជាខ្លាំង និងជំទាស់ដាច់ខាតចំពោះកិច្ចសន្ទនាតាមទូរស័ព្ទរវាងលោក ផាវែល និងលោកស្រី សៃ ហើយទីក្រុងប៉េកាំងក៏បានបង្ហាញគោលជំហរយ៉ាងរឹងមាំនេះ ទៅកាន់សាធារណរដ្ឋឆែកផ្ទាល់ផងដែរ។ មិនតែប៉ុណ្ណោះ លោកស្រី ម៉ាវ បានចោទសួរអំពីការគួរឱ្យជឿជាក់របស់លោក ផាវែល សម្រាប់អ្វីដែលលោកស្រីពិពណ៌នាថា ជាការប្រែប្រួលនៃគោលជំហរ​របស់លោក ដែលថាការអះអាងអធិបតេយ្យរបស់ទីក្រុងប៉េកាំង លើដែនកោះតៃវ៉ាន់ គួរតែទទួលបានការគោរព។

គួរបញ្ជាក់ថា លោក ផាវែល បានជួបសន្ទនាគ្នាតាមទូរស័ព្ទជាមួយ លោកស្រី សៃ កាលពីថ្ងៃចន្ទសប្តាហ៍នេះ ខណៈវាគឺជាសញ្ញា​រីកចម្រើនមួយ នៃផ្នែកការទូតសម្រាប់តៃវ៉ាន់ ដែលមិនមានទំនាក់ទំនងផ្លូវការជាមួយទីក្រុងប្រាកឡើយនោះ។ លោក ផាវែល នឹងក្លាយជាប្រធានាធិបតីទី៤ នៃសាធារណរដ្ឋឆែក ជំនួស លោក មីឡូស ហ្សេម៉ាន (Milos Zeman) គាំទ្រដោយចិននិងរុស្ស៊ី ដែលនឹងចប់អាណត្តិនៅខែមីនា ឆ្នាំ២០២៣៕