(ប៉ាឡេស្ទីន)៖ ក្រុមគ្រូពេទ្យប៉ាឡេស្ទីនបាននិយាយថា យ៉ាងហោចណាស់ជនជាតិប៉ាឡេស្ទីន ៩នាក់បានស្លាប់ និងរាប់សិបនាក់រងរបួសនៅថ្ងៃព្រហស្បតិ៍នេះ អំឡុងពេលការវាយឆ្មក់ដោយកងកម្លាំងយោធាអ៊ីស្រាអែលនៅតំបន់ West Bank។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ​ នៅថ្ងៃព្រហស្បតិ៍ ទី២៦ ខែមករា ឆ្នាំ២០២៣។

ការវាយឆ្មក់នេះត្រូវបានមន្ត្រីសុខាភិបាលប៉ាឡេស្ទីនបានពិពណ៌នាថា ជាប្រតិបត្តិការដ៏កាចសាហាវទៅលើជំរុំជនភៀសខ្លួនក្នុងទីក្រុង Jenin ដែលជាទីតាំងដ៏រឹងមាំរបស់ក្រុមសកម្មប្រយុទ្ធក្នុងតំបន់។

សាក្សីប៉ាឡេស្ទីន និងប្រភពពីអ្នកស្រុកបាននិយាយថា ទាហានអ៊ីស្រាអែលមួយក្រុម ដែលគាំទ្រដោយគ្រឿងចក្រឈូសឆាយ និងរថពាសដែក បានសម្រុកចូលជំរំជនភៀសខ្លួន ដើម្បីចាប់ខ្លួនសកម្មជន និងសកម្មប្រយុទ្ធប៉ាឡេស្ទីន។

ចំណែកខាងភាគីយោធា​អ៊ីស្រាអែល​បាន​ត្រឹមបញ្ជាក់​ថា មានប្រតិបត្តិការ​មួយ​កំពុង​បន្ត​នៅ​ក្នុង​ក្រុង Jenin ប៉ុន្តែ​មិន​បាន​ផ្តល់​ព័ត៌មាន​លម្អិត​បន្ថែម​ទេ។

គួរបញ្ជាក់ថា បើយោងតាមក្រសួងសុខាភិបាលប៉ាឡេស្ទីនបានឲ្យដឹងថា ចាប់តាំងពីដើមខែមករាមក ភាពតានតឹងរវាងអ៊ីស្រាអែល និងប៉ាឡេស្ទីនបាននិងកំពុងកើនឡើង ដោយមានជនជាតិប៉ាឡេស្ទីនជាង ២០នាក់បានស្លាប់ និងរាប់សិបនាក់រងរបួសដោយទាហានអ៊ីស្រាអែល៕