(វ៉ាស៉ីនតោន)៖ អតីតមន្ត្រី FBI ជាន់ខ្ពស់មួយរូបត្រូវបានចោទប្រកាន់កាលពីថ្ងៃច័ន្ទសប្តាហ៍នេះ ពីបទធ្វើការឲ្យមហាសេដ្ឋីរុស្ស៉ី លោក អូឡេក ដឺរីប៉ាស្កា (Oleg Deripaska) ដែលត្រូវបានដាក់ទណ្ឌកម្ម ខណៈដែលរដ្ឋអាជ្ញាសហរដ្ឋអាមេរិកកំពុងបង្កើនកិច្ចខិតខំប្រឹងប្រែង ដើម្បីអនុវត្តការដាក់ទណ្ឌកម្មលើមន្ត្រីរុស្ស៊ី និងក្រុមប៉ូលិសការពារពួកគេ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី២៤ ខែមករា ឆ្នាំ២០២៣។
អតីតមន្រ្តី FBI រូបនោះ គឺលោក ឆាឡេស ម៉េកហ្គោនីហ្កាល (Charles McGonigal) ធ្លាប់បានដឹកនាំផ្នែកប្រឆាំងការស៊ើបការណ៍សម្ងាត់របស់ FBI នៅទីក្រុងញូវយ៉ក មុនពេលចូលនិវត្តន៍ក្នុងឆ្នាំ២០១៨។
រដ្ឋអាជ្ញាបាននិយាយថា ហ្គោនីហ្កាល អាយុ ៥៤ឆ្នាំ កាលពីឆ្នាំ២០២១ បានទទួលការបង់ប្រាក់ដោយលាក់កំបាំងពី លោក ដឺរីប៉ាស្កា ដែលត្រូវបានដាក់ទណ្ឌកម្មនៅឆ្នាំ២០១៨ ជាថ្នូរនឹងការស៊ើបអង្កេតលើគូប្រជែងដែលជាមហាសេដ្ឋរុស្ស៉ីផ្សេងទៀត។ លោក ហ្គោនីហ្កាល ក៏ត្រូវបានចោទប្រកាន់ផងដែរពីការជំរុញឲ្យមានការដកទណ្ឌកម្មប្រឆាំងនឹង លោក ដឺរីប៉ាស្កា តែមិនបានជោគជ័យក្នុងឆ្នាំ២០១៩។ យ៉ាងនេះក្តី នៅឯសវនាការតុលាការសហព័ន្ធរដ្ឋមែនហាតធែន (Manhattan) លោក ហ្គោនីហ្កាល បានបដិសេធរាល់ការចោទប្រកាន់ទាំងនេះ។
ដោយឡែកនៅថ្ងៃចន្ទសប្តាហ៍នេះ រដ្ឋអាជ្ញាសហព័ន្ធនៅទីក្រុងវ៉ាស៊ីនតោន បាននិយាយថា លោក ហ្គោនីហ្កាល ធ្លាប់បានទទួលសាច់ប្រាក់ចំនួន ២២៥,០០០ដុល្លារ ពីអតីតសមាជិកនៃសេវាស៊ើបការណ៍សម្ងាត់របស់ប្រទេសអាល់បានី ហើយករណីនេះកំពុងស្ថិតក្រោមការស៉ើបអង្កេត។
គួរបញ្ជាក់ថា អតីតមន្រ្តី FBI រូបនេះប្រឈមមុខនឹងការចោទប្រកាន់ចំនួន៩បទល្មើស ដែលរួមមានទាំងការធ្វើសេចក្តីថ្លែងការណ៍មិនពិត ដើម្បីលាក់បាំងពី FBI ពីទំនាក់ទំនងរបស់ខ្លួនជាមួយ លោក ដឺរីប៉ាស្កា ស្ថាបនិកក្រុមហ៊ុនអាលុយមីញ៉ូមរុស្ស៊ី និងជាបុគ្គលមួយរូបស្ថិតក្នុងចំណោមមន្ត្រីរដ្ឋាភិបាលរុស្ស៊ីរាប់សិបនាក់ ដែលត្រូវបានដាក់ក្នុងបញ្ជីខ្មៅអាមេរិកកាលពីឆ្នាំ២០១៨ ឆ្លើយតបទៅនឹងការជ្រៀតជ្រែករបស់រុស្ស៊ីនៅក្នុងការបោះឆ្នោតសហរដ្ឋអាមេរិកឆ្នាំ២០១៦៕