(ប៉ារីស)៖ ប្រធានសភានៃសហភាពអឺរ៉ុប លោកស្រី រ៉ូបឺតា មេតសូឡា (Roberta Metsola) បានសន្យាថានឹងធ្វើសកម្មភាពបន្ថែម ដើម្បីទប់ស្កាត់អំពើពុករលួយ ចំពោះមុខការស៉ើបអង្កេតជុំវិញករណីស៉ីសំណូក នៅក្នុងស្ថាប័នមួយនេះ។ នេះបើតាមការចេញផ្សាយ ដោយទីភ្នាក់ងារព័ត៌មាន AFP នៅថ្ងៃអង្គារ ទី១៧ ខែមករា ឆ្នាំ២០២៣។

ថ្លែងទៅកាន់ក្រុមសមាជិកសភាអឺរ៉ុប ក្នុងទីក្រុងស្រ្តាស់បឺគ (Strasbourg) នៃប្រទេសបារាំង លោកស្រី មេតសូឡា បានរៀបរាប់អំពី​ផែនការធ្វើកំណែទម្រង់ជាច្រើន។ ក្នុងនោះរួមមានទាំងគោលការណ៍ហាមឃាត់ សមាជិកសភាអឺរ៉ុបចូលធ្វើការងារពាក់ព័ន្ធទៅនឹង​ឡុបប៊ី (Lobby) បានភ្លាមៗឡើយ ក្រោយអាណត្តិជាប់ឆ្នោតរបស់ពួកគេបញ្ចប់ទៅ។

ម៉្យាងវិញទៀតនោះ លោកស្រី មេតសូឡា ក៏​មានបំណងចង់ពង្រឹងកាតព្វកិច្ច ក្នុងការប្រកាសឱ្យដឹងជាសាធារណៈអំពីជំនួបផ្សេងៗ របស់សមាជិកសភា ហើយដាក់ចេញនូវបទបញ្ញត្តិតឹងរ៉ឹងជាងមុន សម្រាប់បុគ្គលដែលអាចចេញចូលបរិវេណសភាបានផងដែរ។ លោកស្រីក៏​បានប្តេជ្ញាប្រឹងប្រែងដើម្បីធានា ឱ្យបានថាសាធារណជន អាចទទួលបានព័ត៌មានកាន់តែច្បាស់ អំពីការប្រកាសផ្នែកហិរញ្ញវត្ថុរបស់សភា​អឺរ៉ុបថែមទៀតផង។

គួរបញ្ជាក់ថា ចាប់តាំងពីរឿងអាស្រូវពុករលួយ បានផ្ទុះឡើងកាលពីចុងឆ្នាំមុនមក អាជ្ញាធរប្រទេសបែលហ្ស៉ិក បានចាប់ខ្លួនក៏ដូចជា​ចោទប្រកាន់លើ បុគ្គលយ៉ាងហោច៤នាក់ ក្នុងនោះរួមមានទាំងអនុប្រធានសភាអឺរ៉ុប លោកស្រី អ៉ីវ៉ា ខៃលី (Eva Kaili) ដែលជាជនជាតិក្រិក ហើយនិងអតីតសមាជិកសភាអឺរ៉ុបជនជាតិអ៉ីតាលី លោក ភ្យែ អាន់តូនីញ៉ូ ប៉ាន់ហ្សេរី (Pier Antonio Panzeri) ជុំវិញការសង្ស័យថា ពួកគេបានទទួលលុយ និងអំណោយពីប្រទេសកាតា ដើម្បីជះឥទ្ធិពលលើការសម្រេចចិត្តរបស់សភាអឺរ៉ុប៕